У канцы 2023 года ў Польшчы пражывала амаль 119 тыс. беларусаў — ЦБС

11 снежня, Позірк. На 31 снежня 2023 года ў Польшчы пражывала 118.562 грамадзян Беларусі, якія маюць сапраўдны дакумент, выдадзены ў Польшчы і дае права на знаходжанне на тэрыторыі краіны, паведамляе Цэнтр беларускай салідарнасці (ЦБС) са спасылкай на даныя Упраўлення па справах замежнікаў Польшчы.

У прыватнасці, 39.553 беларусы маюць пастаянны від на жыхарства (ПНЖ), 69.399 — часовы від на жыхарства (ЧНЖ), 6.555 чалавек — дадатковую абарону, 1.160 — дазвол на знаходжанне доўгатэрміновага рэзідэнта Еўрасаюза, 436 — часовую абарону, 8 — “іншыя падставы”.

“30 чэрвеня 2023 года падобныя дакументы мела 91 тыс. грамадзян Беларусі, тады як у жніўні 2020 года ў Польшчы было 28 тыс. грамадзян Беларусі, якія маюць такія дакументы, — паведамляе ЦБС. — У 2023 годзе беларусам было выдадзена 46.972 дазволы на часовае знаходжанне”.

Адзначаецца, што колькасць пазітыўных рашэнняў аб прадастаўленні дазволаў на часовае знаходжанне “аказалася практычна ў два разы вышэйшай, чым год таму: 23.156 у 2022 годзе”.

ЦБС звязвае гэта са “спрашчэннямі ў заканадаўстве для грамадзян Беларусі, якія лабіравалі юрысты [арганізацыі]”.

У 2023 годзе было выдадзена 12.083 дазволаў на пастаяннае знаходжанне, а агульная іх колькасць дасягнула 39 тыс. Большасць з іх была выдадзена на падставе наяўнасці “карты паляка” або пацверджанага польскага паходжання без яе.

Усяго за 2023 год беларусы атрымалі каля 59 тысяч дазволаў на знаходжанне ў Польшчы. З іх 57% былі прадастаўлены мужчынам з невялікай перавагай узроставай групы 18–34 года, 56% — на падставе працы, 14% — на падставе ўз’яднання сям’і, 3% — на падставе вучобы і 27% — на іншых падставах.

Пры гэтым ЦБС адзначае рост долі выдадзеных “на іншых падставах”, годам раней іх было 14%: “Гэта шмат у чым звязана з тым, што грамадзяне Беларусі сталі актыўна атрымліваць так званыя “гуманітарныя ВНЖ”.

Агульная колькасць беларусаў, якія звярнуліся па атрыманне міжнароднай абароны ў Польшчы пачынаючы з 30 верасня 2020 года, склала 9.512 чалавек.

У арганізацыі канстатуюць “працяг трэнду на павелічэнне колькасці зваротаў па міжнародную абарону ў Польшчы”.

Часцей за ўсё ў заявы на атрыманне пасведчання на права жыхарства падаюцца ў сталічным Мазавецкім ваяводстве.

У перыяд з 10 жніўня 2020 па 31 снежня 2023 года МЗС Польшчы выдаў: 53.311 “гуманітарных” віз і 89.764 візы Poland Business Harbour, удакладнілі ў ЦБС.