У сувязі са смерцю Ледніка прадстаўнік урада ФРГ запатрабаваў вызвалення палітвязняў у Беларусі

21 лютага, Позірк. “Неадкладнага і безумоўнага” вызвалення палітвязняў запатрабаваў дэпутат Бундэстага, кіраўнік парламенцкай групы “За дэмакратычную Беларусь” Робін Вагенер, які з’яўляецца таксама галоўнай кантактнай асобай урада ФРГ для прадстаўнікоў грамадзянскай супольнасці Расіі і Беларусі ў выгнанні.

“У Беларусі памёр Ігар Леднік — яшчэ адзін палітвязень. Падставай для яго арышту стаў крытычны артыкул. У Ледніка было хворае сэрца. Яго ўтрыманне ў турме было недапушчальна. Я ў думках з яго блізкімі”, — напісаў Вагенер у “Твітары”.

Ігар Леднік памёр на 64-м годзе жыцця ў Мінскай раённай бальніцы, куды быў планава дастаўлены з бабруйскай калоніі №2. Пра гэта стала вядома 20 лютага. Раней ён адбываў пакаранне ў магілёўскай калоніі №15.

Прычынай смерці стала спыненне сэрца.

Журналіст і грамадскі актывіст быў затрыманы 12 красавіка 2022 года. Спачатку ён быў арыштаваны на 15 сутак, затым у дачыненні да яго пачалася крымінальная вытворчасць. 6 верасня 2022 года суд Ленінскага раёна Мінска (суддзя Таццяна Шоцік) прыгаварыў Ледніка да трох гадоў пазбаўлення волі паводле арт. 367 Крымінальнага кодэкса (паклёп у дачыненні да прэзідэнта) за публікацыю ў часопісе “Пазіцыя”, які выдаваўся Беларускай сацыял-дэмакратычнай партыяй (Грамада).

Леднік стаў як мінімум пятым палітвязнем, які не дажыў да выхаду на волю.