Пракуратура г. зв. “днр” накіравала ў суд справу байца палка Каліноўскага Дзюрбейкі, запалоненага ўлетку 2022 года

17 верасня, Позірк. Пракуратура гэтак званай “данецкай народнай рэспублікі” накіравала ў “вярхоўны суд” справу байца палка імя Кастуся Каліноўскага Яна Дзюрбейкі, вынікае з паведамлення Генеральнай пракуратуры Расіі.

Заяўляецца, што 28-гадовы грамадзянін Беларусі “завочна абвінавачваецца” паводле ч. 3 арт. 359 КК РФ (удзел найміта ва ўзброеным канфлікце) — за тое, што “з лютага па ліпень 2022 года браў удзел у баявых дзеяннях на баку Украіны ў розных кропках баявога судотыку”, атрымаўшы за гэта “ўзнагароджанне ў памеры, эквівалентным больш за 300 тыс. рублёў” (каля 3,3 тыс. долараў паводле цяперашняга курсу).

Паводле сцвярджэння Генпракуратуры РФ, Дзюрбейка “абвешчаны ў міжнародны вышук, у дачыненні да яго судом завочна абраная мера стрымання ў выглядзе ўзяцця пад варту”.

Варта адзначыць, што байцы Дзюрбейка (пазыўны “Тромблі”) і Сяргей “Клешч” Дзёгцеў трапілі ў палон пасля бою пад Лісічанскам 26 чэрвеня 2022 года. З таго часу пра тое, дзе яны і ў якім стане, невядома.

11 ліпеня 2023 года Валерый Сахашчык, які тады займаў пасаду прадстаўніка Аб’яднанага пераходнага кабінета па абароне і нацыянальнай бяспецы, паведаміў журналістам у Вільнюсе, што, паводле яго інфармацыі, Дзюрбейка і Дзёгцеў жывыя. “Я неаднаразова размаўляў з прадстаўнікамі ўкраінскіх спэцслужбаў, якія займаюцца вяртаннем палонных. Вельмі далікатная тэма. Людзі нічога канкрэтнага не гавораць. Кажуць: “Так, мы памятаем, так, мы ведаем, мы працуем на падставе сваіх алгарытмаў”. Агулам і ўсё”, — сказаў ён.

25 ліпеня 2024 года Басманны суд Масквы завочна арыштаваў Дзюрбейку і яшчэ аднаго байца палка Каліноўскага Аляксандра Думбляўскаса (таксама трапіў у палон).

30 верасня 2022 года Уладзімір Пуцін падпісаў “дакументы” аб уваходжанні ў склад РФ гэтак званых “данецкай і луганскай народных рэспублік”, а таксама “Запарожскай і Херсонскай абласцей”. За некалькі дзён да гэтага на часова акупаваных украінскіх тэрыторыях пад кантролем расійскіх вайскоўцаў прайшлі адпаведныя “рэферэндумы”.