ДПК паведаміў аб гібелі двух мігрантаў на мяжы з Латвіяй і Польшчай

9 кастрычніка, Позірк. Аб смерці двух мігрантаў на мяжы паведаміў Дзяржаўны памежны камітэт. Абодва целы былі знойдзеныя напярэдадні, 8 кастрычніка, адзначае ведамства.

На мяжы з Польшчай, як гаворыцца ў рэлізе, былі “знойдзены трое збітых бежанцаў з Ірана”, двое замежнікаў “былі братамі, адзін з якіх на момант прыбыцця памежнікаў загінуў”.

Другі труп, грамадзяніна Шры-Ланкі, быў знойдзены на мяжы з Латвіяй полацкімі пагранічнікамі.

ДПК традыцыйна абвінаваціў суседзяў Беларусі ў гібелі мігрантаў, заявіўшы, што “міграцыйная палітыка Польшчы са студзеня ўжо забіла пецярых бежанцаў”, на латвійскім участку з пачатку года загінула 10 замежнікаў, усяго з 2021 года “міграцыйная палітыка ЕС забіла ўжо 58 уцекачоў”.

Беларускія ўлады рэгулярна паведамляюць аб пакутах, фізічных траўмах і гібелі замежнікаў на мяжы з краінамі ЕС, нязменна ўскладаючы адказнасць за гэта на супрацоўнікаў сілавых ведамстваў Польшчы, Літвы і Латвіі.

Міграцыйны крызіс на мяжы Беларусі і краін ЕС прадаўжаецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.

27 кастрычніка 2023 года, каментуючы плыні нелегальнай міграцыі з Беларусі ў краіны Еўразвяза, Аляксандр Лукашэнка заявіў: “Мы не адстойнік, мы нікога тут лавіць не будзем. Тым больш вы (краіны Захаду. — “Позірк”.) іх паклікалі. Няхай ідуць”.