Чвэрць насельніцтва Беларусі пакутуе на дэпрэсію, трывогу і расстройства адаптацыі — БДМУ

9 кастрычніка, Позірк. Распаўсюджанымі псіхічнымі парушэннямі, такімі як трывога, дэпрэсія, расстройства адаптацыі, пакутуе каля 25% насельніцтва Беларусі. Такія даныя, спаслаўшыся на сусветную статыстыку, прывёў на прэс-канферэнцыі 9 кастрычніка дацэнт кафедры псіхіятрыі, наркалогіі, псіхатэрапіі і медыцынскай псіхалогіі Беларускага дзяржаўнага медуніверсітэта (БДМУ), кандыдат медыцынскіх навук Сяргей Давідоўскі.

Ад дэпрэсіі, паводле яго слоў, пакутуе каля 5% насельніцтва (больш за 450 тыс. чалавек). Уплыў псіхічных парушэнняў з’яўляецца адным з фактараў рызыкі развіцця розных саматычных парушэнняў — ад сардэчна-сасудзістых да анкалагічных, адзначыў дацэнт БДМУ.

Давідоўскі падкрэсліў, што ў Беларусі ёсць магчымасць атрымання псіхатэрапеўтычнай і псіхалагічнай дапамогі, у тым ліку бясплатна.

“Ва ўсіх рэгіёнах Беларусі дзейнічаюць цэнтры пагранічных станаў, у якіх працуюць урачы-псіхатэрапеўты і псіхолагі. У Мінску гэтыя кабінеты размешчаны ў звычайных паліклініках. Акрамя таго, існуюць кругласутачныя тэлефоны экстранай псіхалагічнай дапамогі, на якія можна патэлефанаваць і атрымаць неабходную падтрымку. Гэта вельмі важна: зваротная сувязь дапамагае чалавеку ў стане напружання і стрэсу крытычна перагледзець сваю сітуацыю і пазбавіцца ад думак і ідэй, якія могуць прывесці да шкоды або незваротных наступстваў”, — сказаў Давідоўскі.

Пасля падзей 2020 года многія беларусы скардзіліся на псіхічнае здароўе. Цягам некалькіх тыдняў пасля прэзідэнцкіх выбараў псіхолагі дзяжурылі каля Цэнтра ізаляцыі правапарушальнікаў у Мінску (1-ы завулак Акрэсціна), аказваючы дапамогу пратэстоўцам пасля вызвалення.

Пазней у многіх людзей, у тым ліку тых, хто быў прыгавораны да пазбаўлення волі, развіваліся дэпрэсія, посттраўматычнае стрэсавае расстройства (ПТСР), трывожнасць і іншыя праблемы з ментальным здароўем.

ПТСР таксама дыягнастуюць у многіх беларусаў, вымушаных праз рэпрэсіі эміграваць з краіны.