Колькасць камер назірання ў Мінску будзе павялічвацца — начальнік ГУУС

18 жніўня, Позірк. Колькасць камер назірання ў Мінску будзе расці, вынікае з інтэрв’ю начальніка ГУУС Мінгарвыканкама Міхаіла Грыба на сайце ўпраўлення з нагоды 80-годдзя яго ўтварэння.

“Цэнтр маніторынгу грамадскай бяспекі на базе ГУУС і ўсіх РУУС, у якога няма аналагаў у міліцэйскіх падраздзяленнях краіны, мае доступ да выяў і архіваў некалькіх тысяч камер назірання, і гэтая лічба будзе павялічвацца. Ён дазваляе паводле мінімальных арыенцірах знайсці чалавека або аўтамабіль нават у натоўпе або шчыльным патоку”, — сказаў Грыб.

У канцы красавіка 2023 года ён паведаміў, што ў сталіцы ўстаноўлена ўжо больш за 6 тыс. відэакамер, “ствараюцца ўмовы для развіцця сеткі да 30 тыс.”.

У інтэрв’ю з нагоды круглай даты Грыб таксама заявіў, што сталічная міліцыя вядзе маніторынг інфармацыі, якая размяшчаецца ў інтэрнэце. “Не стану хаваць: рэсурсы экстрэмісцкага толку таксама ў нашым полі зроку. Менская міліцыя абараняла і будзе абараняць грамадзян у сетцы”, — заявіў начальнік ГУУС, які фігуруе ў санкцыйных спісах дэмакратычных краін.

18 жніўня ў віншаванні з 80-годдзем утварэння ГУУС Мінгарвыканкама Аляксандр Лукашэнка назваў сталічную міліцыю “узорам адданага служэння народу, традыцыям, абавязку і прысязе”.