Лукашэнка абразіў украінскіх жанчын

20 жніўня, Позірк. Абразлівыя выказванні на адрас украінскіх жанчын дазволіў сабе Аляксандр Лукашэнка ў інтэрв’ю тэлеканалу “Расія” (узятае 15 жніўня, фрагменты апублікаваныя ў той жа дзень, а таксама 18 і 19 жніўня).

На яго думку, украінцы на Захадзе нікому не патрэбныя.

“Яны да нас прыйдуць. Мы будзем аднаўляць усё разбуранае ўжо на больш высокай аснове. Усё роўна ўкраінцы будуць нашымі людзьмі, ніхто іх там не чакае, нікому яны не патрэбныя. Жанчыны будуць у іх падсцілкамі, як гэта цяпер адбываецца. Прыгажуні — украінскія жанчыны — яны проста прастытуцыяй там зарабляюць. А мужыкоў будуць выкарыстоўваць, як захочуць. Вось захацелі кінуць зноў на фронт — іх пачалі адтуль “плюшчыць” ужо, ціснуць і выкідаюць ва Украіну назад, каб адправіць на бойню — у адзін бок”, — сказаў Лукашэнка.

7 сакавіка 2023 года ён назваў прэзідэнта Украіны Уладзіміра Зяленскага “проста гнідой”, абвінаваціўшы яго ў адабрэнні “тэракту” на вайсковым аэрадроме Мачулішчы — пашкоджанні дронам дарагога расійскага самалёта далёкага радыёлакацыйнага выяўлення і кіравання А-50.

“Я яшчэ неяк думаў, што Украіне патрэбны мір, што Зяленскі хварэе за свой народ, — цытуе Лукашэнку ягоная прэс-служба. — Прэзідэнт Зяленскі — проста гніда. Проста гніда! Такія аперацыі не праводзяцца без узгаднення з кіраўніком краіны і галоўнакамандуючым. Гэта я вам кажу як прэзідэнт. Гніда таму, што ён бегае вакол Беларусі, дасылае да нас людзей і просіць, як я ўжо казаў: “Давайце заключым пакт аб ненападзе, давайце дамовімся, у нас з вамі няма ніякіх праблем”.