20 жніўня, Позірк. Палітзняволеныя Ала Зуева і Вольга Стаброўская выйшлі на волю 20 жніўня, паведамляе праваабарончая ініцыятыва Dissidentby, якая пазнала жанчын у сюжэце тэлеканала “Беларусь 1”.
63-гадовая пенсіянерка Зуева пасля затрымання ў чэрвені 2023 года была асуджаная за каментары на 2,5 года пазбаўлення волі паводле арт. 369 (абраза прадстаўніка ўлады) і арт. 368 (абраза прэзідэнта) Крымінальнага кодэкса. Пакутуе ад анкалагічнага захворвання.
64-гадовая Стаброўская была затрыманая ў ліпені 2023 года, прыгавораная да 1 года і 3 месяцаў зняволення паводле арт. 368 КК за каментар у сацсетцы “Аднакласнікі”. Пенсіянерка, інвалід трэцяй групы.
Раней 20 жніўня стала вядома аб вызваленні трох палітзняволеных — журналісткі Ксеніі Луцкінай, Ірыны Санкоўскай і Вольгі Новікавай.
Аляксандр Лукашэнка 16 жніўня падпісаў указ аб памілаванні 30 асоб, асуджаных за злачынствы “пратэстнай накіраванасці”.
У ліку памілаваных 14 жанчын і 16 мужчын, “некаторыя з іх маюць сур’ёзныя захворванні”, “ёсць асобы пенсійнага ўзросту”, гаварылася ў паведамленні прэс-службы Лукашэнкі.
Сцвярджалася, што “ўсе яны прызналі віну, шчыра раскаяліся ў зробленым і ўзялі абавязацельства весці правапаслухмяны лад жыцця”. Кантроль за “выкананнем такіх абавязацельстваў” па даручэнні Лукашэнкі “забяспечыць Міністэрства ўнутраных спраў”.
Праваабаронцы паведамлялі, што ім вядомыя імёны сямі вызваленых, але яны не называюць іх з меркаванняў бяспекі.
