Мастак Аляксей Кузьміч выйшаў з СІЗА ў Францыі

21 жніўня, Позірк. Беларускі мастак-акцыяніст Аляксей Кузьміч выйшаў з СІЗА ў Францыі і скончыў галадоўку, якую трымаў там.

Фатаграфіі з ім на фоне Парыжа і каментар аб спыненні галадоўкі ад першай асобы з’явіліся ў яго інстаграм-акаўнце.

“У мяне дзве дрэнныя навіны: 1) Выхад з галадоўкі па працягласці такі ж, як уваход: два тыдні нельга есці нічога каларыйнага і шкоднага (значыць, смачнага); 2) Другая куды горш: лопату не вярнулі — яна будзе знішчаная жандарамі як прылада злачынства”, — напісаў Кузьміч, маючы на ўвазе лапату, якой імкнуўся раскапаць магілу Ван Гога.

Кузьміч у канцы ліпеня быў затрыманы ў Францыі за перформанс, падчас якога ён раскопваў магілу нідэрландскага мастака Вінсента Ван Гога на муніцыпальных могілках у горадзе Авэр-сюр-Уаз. Па рашэнні суда Кузьміча адправілі ў СІЗА для замежнікаў на месяц.

2 жніўня суд Пантуаза (прыгарад Парыжа) пастанавіў дэпартаваць Кузьміча ў Беларусь. Таксама яго аштрафавалі на 3 тыс. еўра і прыгаварылі да месяца ўмоўнага зняволення.

7 жніўня суд вынес вердыкт пакінуць Кузьміча ў зняволенні яшчэ на 26 сутак. Мастак заявіў, што яго ўтрыманне пад вартай не мае падстаў, што яго права парушаюцца, і абвясціў галадоўку.

14 жніўня Мелунскі адміністрацыйны суд ануляваў рашэнне аб дэпартацыі Кузьміча ў Беларусь.

У лютым 2024 года Кузьміч быў эвакуіраваны з Беларусі фондам салідарнасці BySоl, пасля таго як прыехаў у краіну ў сувязі са смерцю бабулі.

“Органы даведаліся, што я ў Беларусі, і завялі крымінальную справу за мой твор “Транзіт”. Абвясцілі ў вышук. За пару дзён да таго, як прыйшлі дадому са Следчага камітэта, я з’ехаў у вёску. Перад [парламенцкімі] выбарамі сітуацыя абвастрылася. Пайшоў па дамах участковы. Зразумеў, што прыйшоў час. Выехаць з першай спробы не атрымалася. Аказалася, што з Расіі выезд мне таксама забаронены. Я знайшоў шчыліну. І цалкам легальна зваліў. Ужо ў трэці раз”, — пісаў тады Кузьміч у “Фэйсбуку”.

Мастак наведваў краіну і ў 2023 годзе, а ў кастрычніку таго ж года яго відэафільм “Іншапланецяне ў Беларусі. Транзіт або Зад назад” прыцягнуў увагу беларускіх сілавікоў.

Аляксей Кузьміч — сын вядомага мастака, таксама Аляксея Кузьміча. Раней ладзіў правакацыйныя перформансы ў Беларусі.