Лукашэнка абмеркаваў з прадстаўнікамі краін СНД запланаваную на кастрычнік “сустрэчу на вышэйшым узроўні”

30 жніўня, Позірк. Шэраг міжнародных тэлефонных размоў правёў Аляксандр Лукашэнка ў свой дзень нараджэння, 30 жніўня.

Прэс-служба палітыка, якому сёння споўнілася 70 гадоў, паведаміла, што яму паступілі званкі ад прэзідэнта Расіі Уладзіміра Пуціна, Таджыкістана — Эмамалі Рахмона, Азербайджана — Ільхама Аліева, Узбекістана — Шаўката Мірзіёева.

Акрамя таго, Лукашэнка пагаварыў з намеснікам старшыні Савета бяспекі Расіі Дзмітрыем Мядзведзевым (прэзідэнт РФ у 2008–2012 гадах; кіраўнік урада ў 2012–2020 гадах) і старшынёй Савета Федэрацыі Федэральнага сходу Валянцінай Мацвіенка.

“Абмяркоўваліся пытанні развіцця двухбаковых стасункаў і сустрэча, якая мае адбыцца на пачатку кастрычніка на вышэйшым узроўні”, — гаворыцца ў паведамленні.

Прэс-служба не ўдакладняе, пра якую сустрэчу гаворка. Разам з тым вядома, што 8 кастрычніка ў Маскве адбудзецца саміт Садружнасці Незалежных Дзяржаў.

Лукашэнка знаходзіцца ва ўладзе з 1994 года.