2 верасня, Позірк. Офіс Святланы Ціханоўскай атрымаў ад Ерэвана запэўніванні, што “не будзе выдаваць рэжыму Лукашэнкі пераследаваных па палітычных прычынах грамадзян Беларусі”, паведаміў журналістам галоўны дарадца дэмакратычнага лідара Франак Вячорка.
“Мы працягваем працаваць з армянскім МЗС па справе Дзіяны Маісеенкі і іншых беларусаў, якіх вышуквае рэжым Лукашэнкі па палітычных прычынах”, — заявіў ён.
Паводле яго слоў, юрыдычная каманда офіса накіравала ўладам Арменіі дакумент аб неправамерных дзеяннях рэжыму Лукашэнкі і палітычных справах, такіх як справа Маісеенка.
Беларуска была затрыманая пры перасячэнні мяжы паміж Грузіяй і Арменіяй раніцай 2 верасня, але праз некалькі гадзін яе адпусцілі, паведаміў юрыст Алесь Міхалевіч у каментарах да свайго паведамлення аб затрыманні. Пазней ён удакладніў, што паводле рашэння Пракуратуры Арменіі вырашана не браць Маісеенка пад варту на час разгляду экстрадыцыйнай справы, ёй абмежаваны выезд з краіны.
Згодна з яго інфармацыяй, беларускія ўлады абвясцілі Маісеенка ў вышук як абвінавачаную па ч. 1 арт. 342 Крымінальнага кодэкса (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх). Яна была дастаўленая ў аддзяленне паліцыі горада Наэмбяран.
Пры перасячэнні мяжы Грузіі з Арменіяй 2 лютага 2024 года быў затрыманы грамадзянін Беларусі Яраслаў Новікаў. Беларускія ўлады абвясцілі яго ў міждзяржаўны вышук СНД па арт. 435 КК (ухіленне ад мерапрыемстваў прызыву на вайсковую службу). Новікаў быў змешчаны пад варту на 40 дзён для экстрадыцыі, аднак ён звярнуўся па палітычны прытулак. Выдачы перашкодзілі армянскія праваабаронцы і беларускія дэмакратычныя сілы, сітуацыя атрымала шырокую агалоску ў армянскіх СМІ. У траўні Новікаву быў нададзены статус уцекача ў Арменіі.
У чэрвені ў гэтай краіне атрымаў палітычны прытулак грамадзянін Беларусі Максім Вайткявічус. Некалькімі месяцамі раней яго затрымалі пры перасячэнні мяжы Грузіі з Арменіяй на падставе вышуку па тым жа арт. 435 КК.
