Былы намеснік міністра энергетыкі Міхадзюк асуджаны на 6 гадоў зняволення

5 верасня, Позірк. Былы намеснік міністра энергетыкі Міхаіл Міхадзюк прыгавораны да 6 гадоў пазбаўлення волі на падставе рашэння суда Ленінскага раёна Мінска, паведамляюць дзяржаўныя медыя.

Менавіта такое пакаранне запатрабаваў 29 жніўня дзяржабвінаваўца.

Абставінамі, якія змякчаюць адказнасць, у судзе былі названыя “чыстасардэчнае раскаянне, актыўнае садзейнічанне выяўленню злачынстваў, яўка з пакаяннем, кампенсацыя даходу, атрыманага злачынным шляхам, у тым ліку ўнясенне на разліковы рахунак РНПЦ дзіцячай анкалогіі, гематалогіі і імуналогіі дабрачыннага ўзносу”.

Абвінавачанне сцвярджала, што Міхадзюк прыняў ад прадстаўніка кампаніі RIKO незаконную грашовую ўзнагароду ў асабліва буйным памеры. Хабар на агульную суму 35 тыс. еўра “браў у два этапы: у верасні 2022 года і снежні 2023 года”.

28 снежня 2023 года ўрад вызваліў 68-гадовага Міхадзюка, які курыраваў будаўніцтва Беларускай АЭС, ад пасады намесніка міністра энергетыкі “ў сувязі з выхадам у адстаўку”.

Сёлета 14 чэрвеня на нарадзе Аляксандра Лукашэнкі з кіраўніцтвам Савета міністраў стала вядома, што Міхадзюк знаходзіцца ў следчым ізалятары. У той жа дзень дзяржСМІ паведамілі, што 26 студзеня СК узбудзіў супраць экс-чыноўніка крымінальную справу “за спрыяльнае вырашэнне пытанняў па выбары замежнай кампаніі ў якасці падрадчыка для будаўніцтва і мадэрнізацыі высакавольтных падстанцый у Беларусі”.