9 сакавіка, Позірк. З асуджэннем узмацнення рэпрэсій супраць прадстаўнікоў медыясектара выступіла Беларуская асацыяцыя журналістаў (БАЖ) у заяве 9 сакавіка.
Арганізацыя заклікала міжнародную супольнасць павялічыць увагу да Беларусі і патрабаваць ад Мінска неадкладнага спынення рэпрэсій і вызвалення ўсіх палітвязняў.
У БАЖ адзначылі, што за апошнія дні ў Беларусі да турэмнага зняволення былі асуджаныя адразу некалькі журналістаў, “прысуды па справах якіх шакуюць”.
26 лютага былыя кіраўнікі незалежнага рэгіянальнага выдання Intex-press (Баранавічы, Брэсцкая вобласць) Уладзімір Янукевіч і Андрэй Пакаленка асуджаныя на 14 і 12 гадоў пазбаўлення волі ў калоніі, нагадала арганізацыя; да дзевяці гадоў пазбаўлення волі прыгавораны журналіст Павел Дабравольскі (усе абвінавачаныя ў “здрадзе дзяржаве” паводле арт. 356 КК).
За супрацу з медыя на тры гады зняволення асуджаны вядомы музыка Алег Хаменка, аб чым стала вядома 5 сакавіка; па два гады зняволення днём пазней асудзілі журналістку з Полацку (Віцебская вобласць) Ціну Палынскую і яе дачку Маргарыту Рабіновіч (усіх паводле ч. 3 арт. 361¹ КК, “стварэнне экстрэмісцкага фарміравання або ўдзел у ім”).
“Гэта адбываецца на тле трансгранічных рэпрэсій, калі ўлады пераследуюць журналістаў, якія вымушана пакінулі Беларусь (завочны крымінальны пераслед, арышт маёмасці, рэпрэсіі супраць родных), і супярэчыць дэклараванаму нібыта паляпшэнню сітуацыі з правамі чалавека ў Беларусі ў звязку з вызваленнем вядомых палітвязняў”, — гаворыцца ў заяве.
Паводле даных БАЖ, на сёння ў няволі ў Беларусі ўтрымліваюцца 28 прадстаўнікоў медыясектара.
