Палітзняволеная Паліна Шарэнда-Панасюк этапаваная ў гомельскі СІЗА — “Вясна”

11 верасня, Позірк. Паліну Шарэнда-Панасюк этапавалі з ізалятара часовага ўтрымання ў Рэчыцы (Гомельская вобласць) у следчы ізалятар № 3 Гомеля і адразу ж змясцілі ў карцар на 10 дзён. Праваабаронцам стала вядома пра гэта ад мужа палітзняволенай Андрэя Шарэнды.

У рэчыцкі ІЧУ Шарэнда-Панасюк была накіраваная для правядзення следчых дзеянняў па новай крымінальнай справе паводле арт. 411 (злоснае непадпарадкаванне патрабаванням адміністрацыі папраўчай установы, якая выконвае пакаранне ў выглядзе пазбаўлення волі).

Муж палітзняволенай паведаміў, што следчыя дзеянні скончыліся 9 верасня, у той самы дзень яе азнаёмілі з крымінальнай справай. Чакаецца, што справа будзе накіраваная ў пракуратуру на гэтым тыдні, пасля чаго паступіць у суд.

Шарэнда заявіў пра дрэнны фізічны і псіхалагічны стан жонкі, якая “пастаянна знаходзіцца ў катавальных умовах пад ціскам, не атрымлівае нармальнага харчавання”.

Раней ён паведамляў пра рэзкае пагаршэнне стану Паліны Шарэнда-Панасюк, у якой дыягнаставаны хранічны панкрэатыт — “вельмі сур’ёзнае захворванне, якое патрабуе строгай дыеты і пастаяннага кантролю ўрачоў”. Ва ўмовах, у якіх утрымліваецца палітзняволеная, “гэта проста адтэрмінаваны смяротны вырак”, лічыць Андрэй Шарэнда.

У чэрвені 2021 года суд Маскоўскага раёна Брэста прыгаварыў Шарэнда-Панасюк да 2 гадоў пазбаўлення волі ва ўмовах агульнага рэжыму паводле арт. 364 (гвалт у дачыненні да супрацоўніка органаў унутраных спраў), 369 (абраза прадстаўніка ўлады) і 368 (абраза прэзідэнта).

У красавіку 2022 года палітзняволеную прыгаварылі яшчэ да 1 года зняволення паводле ч. 1 арт. 411, у кастрычніку 2023-га — да такога ж тэрміну паводле таго ж артыкула.

21 сакавіка Камітэт ААН па ліквідацыі дыскрымінацыі ў дачыненні да жанчын заклікаў беларускія ўлады зрабіць тэрміновыя захады для абароны Шарэнда-Панасюк. Гэта першы такі выпадак па справах супраць Беларусі.

Раней муж, які знаходзіцца з дзецьмі ў эміграцыі, паведамляў, што Шарэнда-Панасюк “мінімум 32 разы змяшчалася ў нечалавечыя ўмовы” штрафнога ізалятара і карцара, а яшчэ “каля 150 дзён” правяла ў памяшканні камернага тыпу.

22 сакавіка ў эфір выйшла інтэрв’ю Шарэнда-Панасюк дзяржаўнаму тэлеканалу “Беларусь 1”. Яна паведаміла, што звярнулася да Лукашэнкі з прашэннем аб памілаванні.

Праваабаронцы паведамлялі, што яна можа выйсці на волю 21 траўня, аднак пасля стала вядома, што ў дачыненні да яе распачалі трэцюю крымінальную справу паводле арт. 411 КК.