Паводле ўзроўню заробку ў сферы медыцыны Беларусь на перадапошнім месцы ў ЕАЭС

18 верасня, Позірк. Па выніках першага паўгоддзя Беларусь заняла перадапошняе месца ў Еўразійскім эканамічным саюзе (ЕАЭС) паводле ўзроўню сярэднямесячнага намінальнага заробку (у доларавым эквіваленце) у сферы аховы здароўя і сацыяльных паслуг, сведчыць праведзены “Позіркам” аналіз даных Еўразійскай эканамічнай камісіі.

На лідзіруючай пазіцыі ў гэтай галіне па выніках студзеня — чэрвеня апынулася Расія (748 долараў), далей ідуць Казахстан (678), Арменія (595), Беларусь (542) і Кыргызстан (243).

Сярэднямесячны намінальны і рэальны заробак у першым паўгоддзі вырас ва ўсіх краінах ЕАЭС.

Намінальны заробак у Расіі склаў 922 долары ў эквіваленце (+18,1% да ўзроўню студзеня — чэрвеня 2023-га), Казахстане — 875 (+11,5%), Арменіі — 704 (+6,8%), Беларусі — 666 (+19,4%), Кыргызстане — 398 (+10,6%).

Пазіцыі краін у параўнанні з першым кварталам не змяніліся.

ЕАЭС — арганізацыя рэгіянальнай эканамічнай інтэграцыі, якая мае міжнародную правасуб’ектнасць. Яе паўнапраўнымі членамі з’яўляюцца Беларусь, Казахстан і Расія (з 1 студзеня 2015 года), а таксама Арменія (з 2 студзеня 2015 года) і Кыргызстан (з 12 жніўня 2015 года).

Краіны-назіральніцы — Куба, Малдова, Узбекістан. Пагадненне аб зоне свабоднага гандлю з ЕАЭС падпісалі В’етнам, Сербія і Сінгапур.

Падрабязнасці даступныя падпісчыкам “Позірк+”