БАЖ і “Рэпарцёры без межаў” заклікалі краіны ЕС распрацаваць механізмы абароны журналістаў у выгнанні ў сувязі з указам № 278

8 верасня, Позірк. Распрацаваць механізмы абароны беларускіх журналістаў у выгнанні ў сувязі з указам № 278 заклікалі краіны Еўрасаюза Беларуская асацыяцыя журналістаў (БАЖ) і міжнародная арганізацыя “Рэпарцёры без межаў”.

Забарону амбасадам падаўжаць або выдаваць новы пашпарт БАЖ назвала “яшчэ адной пагрозай” для калег, паколькі большасць краін ЕС выдаюць від на жыхарства з тэрмінам дзеяння да заканчэння тэрміну дзеяння пашпарта.

БАЖ “лічыць важным” аб’явіць ужо зараз аб неабходнасці стварэння механізмаў абароны грамадзян Беларусі ў існуючай сітуацыі “ў такіх краінах, як Германія, Чэхія ды іншых”.

“Рэпарцёры без межаў” зазначаюць, што беларускія амбасады “пазбаўляюць афіцыйных дакументаў больш за 400 выгнаных журналістаў”. Арганізацыя “падтрымлівае заклік БАЖ да еўрапейскіх дзяржаў стварыць механізмы абароны гэтых беларускіх грамадзян”.

Указ Аляксандра Лукашэнкі ад 4 верасня № 278 пазбаўляе замежныя ўстановы Беларусі магчымасці падаўжаць тэрмін дзеяння пашпарта беларускага грамадзяніна і выдаваць новыя дакументы. Скасуецца права консульстваў удзельнічаць у працэдуры адчужэння маёмасці, у тым ліку нерухомасці і аўтамабіляў. Такія здзелкі можна будзе ажыццяўляць пры асабістай яўцы ў адпаведныя дзяржорганы або на падставе даверанасці, аформленай на тэрыторыі Беларусі (раней такія даверанасці афармляліся ў дыппрадстаўніцтвах).

Указ уступіў у сілу 7 верасня.

Гл. таксама па тэме:

Ціханоўская абмеркавала з віцэ-міністрам унутраных спраў Літвы праблемы, якія ўзніклі ў сувязі з указам Лукашэнкі № 278ЕС: Указ № 278 — чарговы паказчык поўнага грэбавання рэжыму да фундаментальных правоў беларусаў

ЗША асудзілі рашэнне “рэжыму Лукашэнкі” забараніць беларусам за мяжой працягваць пашпарты