Частка дэфіцыту бюджэту-2024 абумоўлена прыцягненнем звязанага фінансавання на праекты — міністр фінансаў

6 лістапада, Позірк. Частка дэфіцыту дзяржаўнага бюджэту 2024 года, запланаванага ў памеры 1,9 працэнта ВУП, абумоўлена прыцягненнем звязанага фінансавання на розныя праекты. Аб гэтым заявіў міністр фінансаў Юрый Селівёрстаў у праграме “Галоўны эфір” на тэлеканале “Беларусь 1”, каментуючы прыняцце ніжняй палатай парламента праекта бюджэту ў першым чытанні.

Міністр паведаміў, што на гэтым тыдні быў праведзены аўкцыён па продажы аблігацый у кітайскіх юанях, прыцягнута каля 90 млн рублёў. Унутраны рынак пазык падобнага роду на наступны год ён ацаніў у суму да 700 млн долараў ЗША ў эквіваленце.

Паводле слоў Селівёрстава, за кошт запазычанняў плануецца пакрыць зніжэнне даходаў, якія краіна недаатрымала сёлета ад нафтаперапрацоўкі і экспарту калійных угнаенняў.

У 2024 годзе беларускія нафтаперапрацоўчыя заводы разлічваюць атрымаць 2,1 млрд расійскіх рублёў (22,6 млн долараў) зваротнага акцызу на нафту. Аналагічны паказчык 2023 года чыноўнік ацаніў у 1,3 млрд расійскіх рублёў (14 млн долараў).

“Улічваючы, што папярэднія гадоў восем-дзевяць мы жылі практычна без дэфіцыту, калі не браць 2021 год і надалей, то ў прынцыпе ў нас сфармаваны той аб’ём рэшткаў, які мы можам вар’іраваць. Мы не трацім усё да апошняй капейкі, таму нейкія такія моманты можам закрываць”, — заявіў міністр.

Гл. таксама па тэме:

Міністр фінансаў: Дэфіцыт бюджэту-2024 запланаваны на ўзроўні 1,9% ВУП — менш за 5 млрд рублёў