Затрыманы 19-гадовы жыхар Мінска — яго абвінавацілі ў ілжывым мініраванні расійскіх дзяржустаноў

30 верасня, Позірк. Супрацоўнікі УУС Першамайскага раёна Мінска затрымалі 19-гадовага жыхара сталіцы, які адпраўляў, як сцвярджаецца, у дзяржустановы Расіі ілжывыя паведамленні аб мініраванні.

Прэс-служба МУС адзначае, што ў адным з месенджараў затрыманы ўступіў у групу, у якой “абмяркоўвалася тэма сватынгу” (ілжывае паведамленне аб сур’ёзным злачынстве. — “Позірк”.). “Неўзабаве віртуальныя знаёмыя сталі дасылаць яму інструкцыі, у якія дзяржаўныя ўстановы і ад чыйго імя неабходна накіроўваць лісты”, — гаворыцца ў паведамленні ведамства.

“Малады чалавек пісаў паведамленні з электроннай пошты і тэлефанаваў праз інтэрнэт у арганізацыі на тэрыторыі Расіі. Пры гэтым грошы за свае паслугі ён так і не атрымаў”, — заявілі ў МУС.

У якасці прыкладу ведамства апублікавала ўрывак аўдыёзапісу, на якім мужчынскі голас пагражае падарваць замініраваную ім школу, калі яму не дадуць 300 тыс. расійскіх рублёў на працягу двух гадзін.

Узбуджаная крымінальная справа.

МУС адзначае, што “пры рэагаванні на такія пагрозы задзейнічаюцца каласальныя людскія, тэхнічныя і матэрыяльныя рэсурсы экстранных службаў, парушаецца праца ўстаноў”. Пры гэтым, згодна з заканадаўствам, “пакрыццё ўсіх [згаданых] выдаткаў ускладаецца на вінаватую асобу”.