16 сакавіка, Позірк. 225 асоб, “абвінавачаных і асуджаных за ўчыненне злачынстваў”, перадала Беларусі Расія ў 2025 годзе, паведаміла Генеральная пракуратура РФ.
Беларусь за год экстрадавала ў Расію 33 чалавекі.
Усе гэтыя асобы, як заяўляецца, “спрабавалі ўхіліцца ад адказнасці, хаваючыся на тэрыторыі іншых дзяржаў”.
Адзначаецца, што ў асноўным яны здзейснілі крадзяжы, махлярствы і рабаванні, замахі на жыццё і здароўе людзей, парушэнні парадку кіравання транспартнымі сродкамі, злачынствы супраць правасуддзя і правапарушэнні, звязаныя з бяспекай на дарогах і транспарце.
13 лютага 2024 года паведамлялася, што ў базе вышуку МУС РФ фігуруюць імёны 3.186 грамадзян і ўраджэнцаў Беларусі, да траўня ў базу дадалі яшчэ больш за 400 грамадзян Беларусі. Пасля гэтага база пастаянна папаўняецца.
У красавіку 2025 года паведамлялася, што за папярэднія пяць месяцаў на запыт беларускіх уладаў у базу вышуку МУС Расіі было ўключана больш за 1.200 грамадзян і ўраджэнцаў Беларусі. 58 з іх, як адзначалася, у Беларусі былі асуджаныя ў рамках палітычна матываваных крымінальных спраў.
У расійскай базе значацца беларускія добраахвотнікі, блогеры, журналісты, сваякі як былых палітвязняў, так і палітыкаў у эміграцыі.
У 2024 годзе ў Расіі затрыманыя 964 чалавекі, якія адшукваюцца ў Беларусі за здзяйсненне злачынстваў, паведамляў кіраўнік Міністэрства ўнутраных спраў Іван Кубракоў.
