Мінск 14:09

Двое беларусаў аштрафаваныя ў Літве на 50 тыс. еўра кожны за кантрабанду цыгарэт

Ілюстрацыйнае фота: Stock Birken / unsplash.com

20 лістапада, Позірк. Вільнюскі акруговы суд аштрафаваў дваіх грамадзян Беларусі на 50 тыс. еўра кожнага за кантрабанду цыгарэт, паведаміла Генеральная пракуратура Літвы.

Паводле звестак ведамства, у ноч на 27 траўня 2026 года кантрабандысты пераправілі з Беларусі ў Літву з дапамогай дронаў 36 каробак з цыгарэтамі. Груз скінулі ў Свянцянскім раёне. У скрынках знаходзілася 35 тыс. пачкаў NZ Gold і 500 пачкаў Minsk Capital QS з беларускімі акцызнымі маркамі. Кошт партыі склаў 194.580 еўра.

Паведамляецца, што беларусы, якія працавалі ў польскай кампаніі, атрымалі каардынаты месца скіду і на аўтамабілі Volkswagen Passat за некалькі рэйсаў адвезлі скрынкі на склад. Там цыгарэты перагрузілі ў мікрааўтобус, які літоўскія памежнікі спынілі на дарозе Вільнюс — Утэна. Абодвух мужчын затрымалі і ўзялі пад варту. Расследаванне ў дачыненні да іншых удзельнікаў групы выдзелена ў асобную вытворчасць.

Абодва абвінавачаныя прызналі віну і падрабязна распавялі пра абставіны злачынства.

19 лістапада “Позірк” паведамляў, што за кантрабанду цыгарэт з Беларусі на паветраных шарах суд аштрафаваў траіх жыхароў Літвы агулам на 28,9 тыс. еўра. У верасні 2025 года двое з іх па ўказанні арганізатара забралі каля Вільнюскага аэрапорта 1,5 тыс. пачкаў цыгарэт.

17 лістапада стала вядома, што Апеляцыйны суд Літвы пакінуў у сіле прысуд пецярым удзельнікам групы, якая ў 2022 годзе перапраўляла цыгарэты з Беларусі. У іх ліку — літоўскі памежнік, аштрафаваны на 13,4 тыс. еўра з забаронай займаць пасады на дзяржслужбе на працягу трох гадоў.

9 лістапада Каўнаскі акруговы суд аштрафаваў шасцярых чалавек за кантрабанду 33 тыс. пачкаў цыгарэт, дастаўленых з Беларусі беспілотнікамі ў кастрычніку 2024 года. Двум памежнікам прызначылі штрафы ў 21,9 тыс. і 22,2 тыс. еўра, астатнім — ад 17,2 тыс. да 24,9 тыс. еўра.

Падзяліцца: