На пажары ў Шаркаўшчынскім раёне загінула тры чалавекі, у тым ліку малалетняе дзіця

13 кастрычніка, Позірк. За мінулыя аператыўныя суткі (з 6:00 да 6:00) ад агню ў Беларусі загінула тры чалавекі, вынікае са зводкі Міністэрства па надзвычайных сітуацыях.

Трагедыя адбылася ў ноч на 13 кастрычніка ў аграгарадку Германавічы Шаркаўшчынскага раёна (Віцебская вобласць).

Паведамляецца, што ў жылым доме, які належыць мясцовай жыхарцы 1997 года нараджэння, знойдзеныя тры целы: маці гаспадыні 1965 г.н., яе сужыцеля 1970 г.н. і сына гаспадыні 2020 г.н.

“Работнікамі МНС аказана псіхалагічная дапамога сваякам загінулага дзіцяці. Прычыны пажару і гібелі высвятляюцца”, — адзначае ведамства.

Паводле звестак МНС, з пачатку года ў Беларусі адбылося 4.850 пажару — на 6,5% больш, чым за аналагічны перыяд 2023-га (4.554). Загінула 388 чалавек (354; +9,6%), у тым ліку 9 дзяцей (5, +80%), траўмавана 488 (431; +13,2%).