Ціханоўская і Латушка абмеркавалі з кіраўніком Мінюста Германіі прыцягненне Лукашэнкі да адказнасці
15 кастрычніка, Позірк. Прыцягненне Аляксандра Лукашэнкі да адказнасці за ўчыненыя ім злачынствы абмеркавана падчас сустрэчы дэмакратычнага лідэра Святланы Ціханоўскай і намесніка кіраўніка Аб’яднанага пераходнага кабінета Паўла Латушкі з міністрам юстыцыі Германіі Марка Бушманам у Берліне 15 кастрычніка, паведамляе прэс-служба НАУ.
Большасць у беларускім грамадстве “чакае выкарыстання інструментаў замежнымі партнёрамі ў рамках міжнародных інстытутаў для таго, каб адказнасць за злачынствы, учыненыя прадстаўнікамі рэжыму”, лічыць Латушка.
“Ролю Германіі ў выкарыстанні інструментаў міжнароднага правасуддзя складана пераацаніць. Германія заўсёды стаіць на баку абароны правоў чалавека і мы разлічваем на працяг дадзенай дакладнай пазіцыі Германіі ў дачыненні да абароны правоў чалавека ў Беларусі і прыцягнення да адказнасці вінаватых за іх парушэнне”, — сказаў намеснік кіраўніка АПК.
Па сцвярджэнні прэс-службы, міністр прапанаваў працягнуць актыўнае ўзаемадзеянне па гэтым пытанні з Фондам супрацоўніцтва ў сферы міжнароднага права (Foundation for International Legal Cooperation), “які актыўна ўзаемадзейнічае з Міністэрствам юстыцыі Германіі”.
Берлін гатовы “факусавацца на расследаванні злачынстваў супраць чалавечнасці ў рамках універсальнай юрысдыкцыі ў тым выпадку, калі ахвяры рэжыму знаходзяцца на тэрыторыі Германіі”, дадаў ён.
Бушман таксама заявіў, што Германіяй будзе вывучаны пададзены 30 верасня ўрадам Літвы зварот у офіс пракурора Міжнароднага крымінальнага суда па фактах трансмежавых злачынстваў супраць чалавечнасці ў дачыненні да беларусаў і “будзе выпрацавана адпаведнае рашэнне”.
