Беларусь пачне выходзіць з дэмаграфічнай ямы да 2030 года, сцвярджае Мінпрацы
18 кастрычніка, Позірк. Згодна з прагнозамі, да 2030 года Беларусь пачне выходзіць з дэмаграфічнай ямы, заявіў намеснік міністра працы і сацыяльнай абароны Валерый Кавалькоў 17 кастрычніка ў Мінску на агульнагарадскім дні інфармавання.
“На змену таго пакалення, якое было ў 1990-я гады (досыць складаныя)… у 2000 годзе ўжо адзначаецца рост нараджальнасці, такім чынам, да 2030 года ў нас будуць тыя маладыя людзі і дзяўчаты, якія сапраўды будуць ствараць сем’і, яны змогуць нарадзіць большую колькасць дзяцей”, — сказаў чыноўнік (на падставе відэаматэрыялу дзяржаўнага інфармагенцтва “Мінск-Навіны“).
Кажучы пра падтрымку з боку дзяржавы, Кавалькоў адзначыў, што 1 студзеня 2025 года набудзе моц “закон аб дзярждапамогах сем’ям, якія выхоўваюць дзяцей”, у якім узнятыя “мінімальныя гарантыі — дапамога па цяжарнасці і родах, дапамога па догляду дзіцяці да трох гадоў, <…> для сем’яў, якія выхоўваюць дзіця-інваліда”.
Згодна з данымі Нацыянальнага статыстычнага камітэта, колькасць насельніцтва Беларусі на 1 студзеня 2024 года склала 9.155.978 чалавек. На пачатак 2023 года ў краіне жыло 9.200.617 чалавек. Такім чынам, за год колькасць жыхароў зменшылася на 44.639 (-0,49%).
На 1 студзеня 2022-га ў Беларусі пражывала 9.255.524 чалавекі, 2021-га — 9.349.645, 2020-га — 9.410.259.
З статыстыкі вынікае, што з пачатку 2020 года колькасць жыхароў скарацілася на 254.281.
Даныя Белстата, апублікаваныя да Дня маці (14 кастрычніка), сведчаць, што ў Беларусі змяншаецца колькасць жанчын, у тым ліку рэпрадуктыўнага ўзросту.
Калі на пачатак 2023 года ў краіне пражывала 4.059.900 жанчын ва ўзросце больш за 18 гадоў, то на пачатак 2024-га — 4.051.900 (змяншэнне колькасці на 8.000, або на 0,2%). Колькасць жанчын рэпрадуктыўнага ўзросту (15–49 гадоў) скарацілася з 2.154.800 на пачатку 2022 года да 2.118.900 напрыканцы 2023-га.
У Беларусі ўступілі ва ўзрост дзіцянараджэння жанчыны пакалення дэмаграфічнай ямы, заявіў намеснік міністра аховы здароўя Юрый Горбіч 16 кастрычніка 2023 года на міжнароднай канферэнцыі “Сям’я ў цэнтры сацыяльна-дэмаграфічнай палітыкі дзяржавы”.
Згодна з прадстаўленымі ў той дзень данымі Белстата, сумарны каэфіцыент нараджальнасці з 2016 па 2023 год зменшыўся з 1,73 да 1,38 дзіцяці на адну жанчыну фертыльнага ўзросту (сярэдняя колькасць дзяцей, якіх магла б нарадзіць адна жанчына на працягу ўсяго рэпрадуктыўнага перыяду).