Лукашэнка прапанаваў насельніцтву купляць участкі ў неперспектыўных вёсках

21 кастрычніка, Позірк. Неабходна ствараць умовы, каб беларусы часцей будавалі жыллё ў вёсках, заявіў Аляксандр Лукашэнка 21 кастрычніка на нарадзе па пытаннях развіцця сеткі рэспубліканскіх аўтамабільных дарог і фармавання транспартнай інфраструктуры.

“Трэба ўсё ж такі нашых беларусаў павольна разгортваць, падштурхоўваць да таго, каб яны ў вёсках, неперспектыўных вёсках або хутарах, дзе заўгодна, куплялі ўчасткі, — цытуе Лукашэнку ягоная прэс-служба. — Гэта ўсё ж такі амаль палова гектара ўчастак. А ёсць шмат участкаў, дзе ніколі людзі не жылі, але там можна пабудаваць жыллё. І багатых людзей дастаткова, небагатых, але жадаючых пабудаваць жыллё ў вёсцы, каб дзеці ў іх па траве маглі хадзіць басанож кожны год. Трэба падштурхоўваць іх да гэтага і ствараць адпаведныя ўмовы”.

Гэтыя пытанні, дадаў ён, неабходна прадугледзець у дзяржаўнай праграме будаўніцтва жылля на наступную пяцігодку.

У жніўні Лукашэнка ўжо заяўляў (https://pozirk.online/be/news/101095/) на нарадзе з урадам, што хоча “надаць новы імпульс” будаўніцтву жылля ў вёсцы.

Паводле яго слоў, урад прапанаваў “цэлы комплекс навацый: ад спрашчэння падключэння да інжынернай інфраструктуры індывідуальных дамоў да пашырэння фінансавай падтрымкі маладым сем’ям (да 31 года)”, аднак “агульнай згоды па дакументах не дасягнута”. “Не зразумела, дзеля чаго абавязваць забудоўшчыка выкарыстоўваць праектную дакументацыю пры ўзвядзенні індывідуальных дамоў на вёсцы, калі ад гэтага адмовіліся яшчэ год таму”, — сказаў Лукашэнка.