Палітвязнямі прызнана яшчэ восем чалавек

22 кастрычніка, Позірк. Яшчэ восем чалавек прызнана палітвязнямі беларускімі праваабарончымі арганізацыямі 21 кастрычніка, вынікае з заявы, распаўсюджанай ПЦ “Вясна”.

Гэты статус атрымалі пяць зняволеных пад варту і тры асуджаныя.

Пад варту ўзяты Аляксандр Якушкоў па абвінавачанні ва ўдзеле ў экстрэмісцкім фарміраванні паводле арт. 361¹ КК; Арцём Зянькоў — паводле абвінавачання ў фінансаванні экстрэмісцкай дзейнасці за ахвяраванні ў ініцыятывы, прызнаныя экстрэмісцкім фарміраваннем, паводле арт. 361²; Валерый Мяфодзіенка — у фінансаванні экстрэмісцкай і тэрарыстычнай дзейнасці за ахвяраванні ў ініцыятывы, прызнаныя экстрэмісцкім фарміраваннем, паводле арт. 361² і 290¹; Андрэй Лабада — у абразе прадстаўніка ўлады і ў фінансаванні экстрэмісцкай дзейнасці за выказванні ў інтэрнэце і ахвяраванні ў ініцыятывы, прызнаныя экстрэмісцкімі фармаваннямі паводле арт. 369 і 361²; Марына Леановіч — у фінансаванні экстрэмісцкай дзейнасці за ахвяраванні пратэстным ініцыятывам і беларускім добраахвотнікам у складзе ВСУ паводле арт. 361² і 361³.

Таксама палітвязнямі прызнаныя Яўген Зайцаў, асуджаны па абвінавачанні ў садзейнічанні экстрэмісцкай дзейнасці і ўдзеле ў групавых дзеяннях, якія груба парушаюць грамадскі парадак парадак, паводле арт. 361⁴ і 342 КК да пазбаўлення волі ў папраўчай калоніі; Яўген Сцяпанаў, асуджаны па абвінавачанні ва ўдзеле ў экстрэмісцкім фармаванні паводле арт. 361¹ да пазбаўлення волі ў папраўчай калоніі і Сяргей Паўлавіцкі, асуджаны па абвінавачанні ў фінансаванні экстрэмісцкай дзейнасці паводле арт. 361² да трох гадоў пазбаўлення волі ў папраўчай калоніі.

Прадстаўнікі праваабарончай супольнасці адзначылі, што пазбаўленне волі і крымінальная адказнасць за розную пратэстную актыўнасць выкарыстоўваецца ўладамі для падаўлення грамадскай і палітычнай актыўнасці, іншадумства і антываенных выступаў.

Яны патрабуюць неадкладна вызваліць згаданых і ўсіх палітычных вязняў, а таксама спыніць палітычныя рэпрэсіі супраць грамадзян краіны.

Заяву падпісалі праваабарончы цэнтр “Вясна”, Беларускі Хельсінкскі камітэт, Офіс па правах людзей з інваліднасцю, “Прававая ініцыятыва”, Беларуская асацыяцыя журналістаў і Беларускі ПЭН.

Пасля яго прыняцця палітвязнямі ў Беларусі прызнана 1.299 чалавек.