Лукашэнка назваў “дурнямі” Трампа і Харыс — кандыдатаў на прэзідэнцкіх выбарах у ЗША

24 кастрычніка, Позірк. Прэзідэнцкія выбары ў ЗША — “жудасныя, дурныя”, а кандыдаты Камала Харыс і Дональд Трамп — “дурні”, заявіў Аляксандр Лукашэнка 23 кастрычніка ў інтэрв’ю тэлеканалу “Расія 1”.

Відэафрагмент размовы з прапагандысткай Вольгай Скабеевай апублікаваны на неафіцыйным тэлеграм-канале прэс-службы Лукашэнкі “Пул Першага”.

“Слухайце, дурні ўсе, чэснае слова. Я часта кажу: калі б гэта ў нас ці ў Расіі, ніводнага дурня не абралі б — ні аднаго, ні другога. Жудасныя. Гэтая — некампетэнтная, а той ляпае чорт ведае што”, — сказаў Лукашэнка.

“Ну навошта ты абражаеш, жанчына ўрэшце рэшт, — дадаў ён, відавочна, маючы на ўвазе перадвыбарчую рыторыку Трампа. — Мужыкі нармальныя з жанчынамі не ваююць. Дура, такая-сякая. Ну ўяві ў Расіі ці ў Беларусі нехта выйшаў: “Дурань”. Гэта ад сябе адштурхнуў велізарную колькасць людзей”.

Паводле слоў Лукашэнкі, яму “не падабаецца тэзіс [Трампа] заканчэння вайны з Украінай”. Пры гэтым на выбарах у ЗША ён падтрымлівае менавіта яго.

“Прыйдзе новы чалавек — нешта, магчыма, будзе новае. Прынамсі, нагаварыў жа шмат. Таму можна будзе і спытаць. Вось толькі з гэтых пазіцый. А не таму, што падабаецца мне Трамп або яго праграма. Гэта глупства такое… Не ведаю, куды мільярд долараў выдаткавалі адзін штаб і іншы. Яны куды глядзяць? Хоць бы ўжо асяклі і падказалі. Хоць Дональда Трампа вельмі складана асякчы, вы гэта разумееце”, — сказаў Лукашэнка.

Лукашэнка, яго атачэнне і прапагандысты рэгулярна абражаюць сваіх палітычных апанентаў у публічных выступах.

У ліпені 2021 года Лукашэнка назваў свайго суперніка на выбарах 2020-га Святлану Ціханоўскую “дурай” і “мярзотніцай”. Пры гэтым ён рэгулярна заяўляе, што “з жанчынамі не ваюе”.

Выбары прэзідэнта ЗША пройдуць 5 лістапада 2024 года.