У Грузіі затрымалі беларуса з буйной партыяй наркотыкаў, яму пагражае працяглы тэрмін зняволення аж да пажыццёвага

2 красавіка, Позірк. Грамадзянін Беларусі 1990 года нараджэння затрыманы з буйной партыяй наркотыкаў у горадзе Зугдзідзі (адміністрацыйны цэнтр краю Самегрэла-Верхняя Сванэція) на захадзе Грузіі, паведаміла 2 красавіка прэс-служба Міністэрства ўнутраных спраў гэтай краіны.

“Падчас вобшуку асабістых рэчаў і транспартнага сродку затрыманага супрацоўнікамі праваахоўных органаў у якасці рэчыўнага доказу выняты наркатычны сродак метадон у асабліва буйным памеры — 91 упакоўка”, — гаворыцца ў паведамленні.

Распачатая справа паводле п. “а” ч. 6 арт. 260 Крымінальнага кодэкса Грузіі. Санкцыі па гэтай частцы артыкула — пазбаўленне волі на тэрмін ад 8 да 20 гадоў альбо пажыццёвае зняволенне.

Пра затрыманне 22 чалавек, у тым ліку грамадзян Беларусі, Украіны, Іарданіі і Турцыі МУС Грузіі паведамляла 21 лютага. Колькасць беларускіх грамадзян не называлася.

Падчас вобшукаў у дамах і іншых месцах вынятая “асабліва вялікая колькасць” розных відаў наркотыкаў, у тым ліку гераін, бупрэнарфін, экстазі, субаксан, метадон, амфетамін, мефедрон, альфа-ПВП і марыхуана.

Былі таксама вынятыя грошы, клейкая стужка і электронныя шалі.