Былы галоўны рэдактар “Бабруйскага кур’ера” Санаценка арыштаваны на 15 сутак

2 красавіка, Позірк. Пра арышт на 15 сутак былога галоўнага рэдактара прыватнай газеты “Бабруйскі кур’ер” Анатоля Санаценкі паведаміла Беларуская асацыяцыя журналістаў 1 красавіка.

Паводле звестак арганізацыі, рашэнне было прынятае 31 сакавіка судом Бабруйскага раёна і горада Бабруйска (Магілёўская вобласць).

Мяркуецца, што журналіста судзілі паводле арт. 19.11 КаАП (распаўсюджванне, выраб, захоўванне, перавозка інфармацыйнай прадукцыі, якая змяшчае заклікі да ажыццяўлення экстрэмісцкай дзейнасці або прапагандуе такую дзейнасць).

У той жа дзень, адзначае БАЖ, вобыск адбыўся ў доме пляменніка журналіста — Віталя Санаценкі, які некаторы час валодаў выданнем як індывідуальны прадпрымальнік.

Санаценка раней затрымліваўся ў верасні 2022 года. Яго двойчы судзілі паводле згаданага артыкула КаАП. Журналіст правёў 30 сутак за кратамі ў ізалятары часовага ўтрымання.

26 верасня 2022 года суд Бабруйскага раёна і горада Бабруйска прызнаў матэрыялы сайта выдання “экстрэмісцкай” інфармацыйнай прадукцыяй. З таго часу “Бабруйскі кур’ер” спыніў сваё існаванне.

Паводле БАЖ, у 2024 годзе 35 медыя было прызнана “экстрэмісцкімі фарміраваннямі”.

Сістэмныя рэпрэсіі ў дачыненні да незалежных СМІ ў Беларусі працягваюцца з 2020 года. Шматлікія рэдакцыі працуюць у выгнанні. Напярэдадні чарговых выбараў узмацняецца ціск як на тых, хто застаўся ў краіне, так і на тых, хто жыве за мяжой.