У гадавіну ўсталявання нейтралітэту Аўстрыі Лукашэнка заклікаў не паўтараць “памылак мінулага”
26 кастрычніка, Позірк. Прынятае 69 гадоў таму “лёсавызначальнае рашэнне пра вечны нейтралітэт” дало магчымасць аўстрыйцам “пабудаваць сучасную дзяржаву на прынцыпах мірнага суіснавання і добрасуседства”, адзначыў Аляксандр Лукашэнка, віншуючы 26 кастрычніка народ Аўстрыі з Нацыянальным святам.
На яго думку, беларусы, як і аўстрыйцы, “ведаюць сапраўдную цану пашырэння вайсковых альянсаў, бескантрольнай гонкі ўзбраенняў, якія прывялі да канфрантацыі і пачатку самага жудаснага і небяспечнага ваеннага канфлікту ў ХХ стагоддзі”. “Тое ж адбываецца перад вашымі вачыма сёння”, — прыводзіць тэкст паслання прэс-служба віншавальніка.
Другая сусветная вайна, адзначыў ён, прынесла “вельмі шмат пакут і ахвяр”, таму нельга “забыцца пра яе наступствы”.
“Сучасным палітыкам і вайскоўцам трэба ведаць гісторыю, каб не паўтарыць памылак мінулага. У 2025 годзе ўсе людзі добрай волі будуць адзначаць 80-годдзе перамогі над нацызмам. Вельмі спадзяюся, што вы таксама далучыцеся да святкавання гэтай важнай падзеі”, — гаворыцца ў віншаванні.
26 кастрычніка 1955 года парламент Аўстрыі прыняў канстытуцыйны акт пра сталы нейтралітэт. З таго часу гэты дзень адзначаецца ў краіне як Нацыянальнае свята.
Аўстрыя з’яўляецца часткай Еўрапейскага саюза, які не прызнае Лукашэнку легітымным прэзідэнтам Беларусі. Еўрасаюз увёў у дачыненні да прадстаўнікоў яго рэжыму санкцыі.
У сваю чаргу ўрад Беларусі летась увесну зацвердзіў пералік “замежных дзяржаў, якія ўчыняюць недружалюбныя дзеянні ў дачыненні да беларускіх юрыдычных і (або) фізічных асоб”, у які ўваходзяць усе краіны ЕС.
На гэтым фоне Лукашэнка віншуе з рознымі святамі не кіраўніцтва, а народы “недружалюбных краін”. Сёлета, напрыклад, апрача аўстрыйцаў ён звяртаўся да шведаў, французаў, немцаў, іспанцаў.
Беларусь у ЕС мае "сяброў, якія часова застопарылі" стасункі, сцвярджае Петрышэнка
6 ліпеня, Позірк. У Беларусі "вельмі шмат сяброў", заявіў намеснік прэм'ер-міністра Ігар Петрышэнка 6 ліпеня ў Александрыі (Магілёўская вобласць) на адкрыцці фестывалю "Купалле. Александрыя збірае сяброў". "[Маюцца] тыя сябры, якія часова недзе застопарылі з іх геапалітычных матываў стасункі з намі. Я маю …
