На мяжы затрыманы грамадзянін Украіны, які спрабаваў увезці ў Беларусь наркотык

28 кастрычніка, Позірк. Аб затрыманні ў пункце пропуску “Брэст” на мяжы з Польшчай грамадзяніна Украіны, які спрабаваў увезці ў Беларусь наркотык (гашыш), паведамляе прэс-служба Дзяржаўнага мытнага камітэта.

Адзначаецца, што пры праходжанні мытнага надгляду затрыманы “выкінуў пакет”, які быў у яго пры сабе, аднак на гэта “адрэагаваў службовы сабака”.

Экспертыза ўпраўлення Дзяржаўнага камітэта судовых экспертыз па Брэсцкай вобласці паказала, што ў “пакеце быў небяспечны наркатычны сродак”, гаворыцца ў паведамленні.

Узбуджаная крымінальная справа паводле ч. 1 арт. 3281 КК (незаконнае перамяшчэнне праз мытную мяжу Еўразійскага эканамічнага саюза і (або) дзяржаўную мяжу Рэспублікі Беларусь наркатычных сродкаў, псіхатропных рэчываў або іх прэкурсораў або аналагаў). Санкцыя гэтай часткі артыкула прадугледжвае абмежаванне волі на тэрмін да чатырох гадоў або пазбаўленне волі на тэрмін ад трох да сямі гадоў са штрафам або без штрафу.

У 2023 годзе мытнымі органамі “было выяўлена каля 400 фактаў незаконнага перамяшчэння праз мытную мяжу наркатычных сродкаў і псіхатропных рэчываў”, паведаміў на прэс-канферэнцыі ў Мінску 23 верасня начальнік Галоўнага ўпраўлення па наркакантролі і супрацьдзеянні гандлю людзьмі МУС Алег Сільвестровіч.

“Было ўзбуджана 275 крымінальных спраў. З незаконнага абароту было вынята больш за 800 кг наркатычных сродкаў і псіхатропных рэчываў”, — сказаў ён.

Палата прадстаўнікоў 17 верасня прыняла ў першым чытанні законапраект “Аб змяненні кодэксаў па пытаннях крымінальнай адказнасці”. Дакумент змяшчае змены ў Крымінальны, Крымінальна-працэсуальны, Крымінальна-выканаўчы кодэксы, а таксама Кодэкс аб адміністрацыйных правапарушэннях і Працэсуальна-выканаўчы кодэкс аб адміністрацыйных правапарушэннях.

Папраўкі ўтрымліваюць “альтэрнатыўныя больш мяккія пакаранні” ў выглядзе арышту на тэрмін да трох месяцаў за набыццё або захоўванне наркотыкаў (ч. 1 арт. 328 КК); абмежаванні свабоды за разавыя выпадкі іх збыту (ч. 2 арт. 328). У цяперашні час ч. 1 прадугледжвае пакаранне ў выглядзе абмежавання волі на тэрмін да 5 гадоў або пазбаўлення волі на тэрмін ад 2 да 5 гадоў, ч. 2 — пазбаўленне волі на тэрмін ад 5 да 8 гадоў са штрафам або без яго.

Прапануецца паменшыць ніжні памер пакарання за збыт наркотыкаў у складзе арганізаванай групы з 10 да 8 гадоў пазбаўлення волі (ч. 4 арт. 328).