Латвія абвясціла ў вышук прарасійскага журналіста Аляксеева, які ўцёк у Беларусь

Крыніца: старонка Юрыя Аляксеева ў "Фэйсбуку"

28 кастрычніка, Позірк. Прарасійскі журналіст Юрый Аляксееў абвешчаны ў Латвіі ў вышук, паведамляе выданне lsm.lv.

Рашэнне прыняў Курземскі раённы суд у Вентспілсе, пасля таго як Аляксееў не з’явіўся на пасяджэнне па справе аб “распальванні варожасці”, гаворыцца ў публікацыі.

27 кастрычніка стала вядома, што Аляксееў збег з Рыгі ў Беларусь. На сваёй старонцы ў “Фэйсбуку” ён паведаміў, што мае намер прасіць у краіне палітычнага прытулку.

Ураджэнец Нарыльска (цяпер РФ) Аляксееў у Латвіі ў розны час быў галоўным рэдактарам выданняў “Бізнес&Балтыя”, “Камерсант Baltic”, “Бизнес.lv”.

Таксама ён стварыў і ўзначальваў праект Imhoclub.lv, які прасоўваў пракрамлёўскія наратывы. Улады Латвіі заяўлялі, што медыя фінансуецца з Расіі.

Справа аб “распальванні варожасці” ў дачыненні да Аляксеева была распачатая ў 2017 годзе. Падчас ператрусу па месцы жыхарства журналіста былі выяўленыя патроны для пісталета. Таксама паведамлялася аб знойдзеных у яго камп’ютары матэрыялах з дзіцячай парнаграфіяй.

У студзені 2023 года Рыжскі раённы суд прыгаварыў Аляксеева па сукупнасці абвінавачванняў да аднаго года і аднаго месяца пазбаўлення волі. Пры гэтым ён застаўся на волі — яму ўстанавілі ўмоўна-датэрміновы нагляд на адзін год.

Раней Аляксееў называў сябе “на чвэрць беларусам”, кампліментарна адгукаўся аб Аляксандры Лукашэнку.

Пасля расійскага ваеннага ўварвання ва Украіну 24 лютага 2022 года ў Беларусь рэгулярна ўцякаюць з дэмакратычных краін прыхільнікі Расіі і Лукашэнкі. Адзін з самых вядомых перабежчыкаў — былы польскі суддзя Томаш Шмыдт. У траўні ён прыбыў у Беларусь і заявіў хадайніцтва аб атрыманні палітычнага прытулку. Неўзабаве быў працаўладкаваны ў дзяржаўнае інфармагенцтва БелТА. У Польшчы ў дачыненні да яго вядзецца расследаванне, судом выдадзены ордэр на арышт Шмыта.