Вярхоўны суд пакінуў без змен завочны прысуд журналісту Хільмановічу

29 кастрычніка, Позірк. Вярхоўны суд пакінуў без зменаў завочны прысуд журналісту Уладзіміру Хільмановічу, паведамляе прэс-служба ВС.

Справа журналіста судовая калегія па крымінальных справах Вярхоўнага суда разгледзела 25 кастрычніка 2024 года.

Гродзенскі абласны суд 19 жніўня завочна прыгаварыў Хільмановіча да пяці гадоў пазбаўлення волі са штрафам у памеры тысячы базавых велічынь (40 тыс. рублёў). Яго прызналі вінаватым паводле арт. 361⁴ (садзейнічанне экстрэмісцкай дзейнасці) і ч. 3 арт. 361¹ (стварэнне экстрэмісцкага фарміравання або ўдзел у ім) Крымінальнага кодэкса.

Згодна з апублікаванай ВС пастановай суда першай інстанцыі, на частку маёмасці журналіста (кватэру ў Гродне, будынак спецыялізаваны культурна-асветнага і відовішчнага прызначэння ў вёсцы Навасёлкі Мастоўскага райна Гродзенскай вобласці, бытавую тэхніку і грашовыя сродкі ў суме 100 еўра) накладзены арышт.

Пры гэтым арышт зняты з зямельнага ўчастка і іншай кватэры ў Гродне.

Спецыяльная вытворчасць у дачыненні да Хільмановіча была распачата ў сакавіку. Следчы камітэт тады паведамляў, што яму інкрымінаваны толькі ч. 1 і 2 арт. 361⁴.

Хільмановіч — журналіст, краязнаўца, аўтар “Каляндарнага краязнаўчага даведніка Гродзеншчыны”. 1 снежня мінулага года ў кватэры жонкі Хільмановіча, дзе ён жыў з 2014 па 2021 год, сілавікі правялі ператрус. Былі канфіскаваны жорсткі дыск камп’ютара, пасведчанне, 25 кніг, музычны дыск, паштовыя маркі, канверты, паштоўкі, буклеты, значкі, газеты.