У “спіс экстрэмістаў” уключаныя Вераніка Цапкала, Вольга Карач, Анатоль Котаў

4 лістапада, Позірк. У пералік “асоб, якія маюць дачыненне да экстрэмісцкай дзейнасці”, 1 лістапада дададзена яшчэ 24 чалавекі. Цяпер у дакуменце, што знаходзіцца на сайце Міністэрства ўнутраных спраў, 4.618 пазіцый.

Сярод унесеных у спіс — асуджаны Уладзімір Парашкоў, а таксама 9 палітвязняў: Ірына Такарчук (маці былой палітзняволенай Вольгі Такарчук), Анатоль Чурыкаў, Ілля Лукашэнка, Аляксандр Рудкоўскі, Сяргей Скробат, Аляксандр Малькоў, Юрый Гусейнаў, Ігар Шыманчык, Сяргей Гоўша.

Уключаны ў “спіс экстрэмістаў” Аскер Алахвердзіеў прымусова лечыцца ў псіхіятрычным стацыянары з узмоцненым наглядам, праваабаронца Алена Маслюкова знаходзіцца за мяжой. Яна асуджаная завочна на тры гады пазбаўлення волі па ч. 1 і 2 арт. 361⁴ КК (іншае садзейнічанне экстрэмісцкай дзейнасці; тое ж дзеянне, здзейсненае паўторна). У дачыненні да яе крымінальная справа разглядалася ў рамках спецвытворчасці.

Таксама да “экстрэмістаў” прылічаныя палітыкі Вераніка Цапкала, Анатоль Котаў, Яўген Вільскі, актывістка Вольга Карач, архітэктар Вадзім Дзмітранок, асуджаныя завочна ў ліпені 2024 года на 12 гадоў пазбаўлення волі.

Усе фігуранты прызнаныя вінаватымі па арт. 357 (змова ці іншыя дзеянні, учыненыя з мэтай захопу дзяржаўнай улады) і 361¹ (стварэнне экстрэмісцкага фарміравання альбо ўдзел у ім) Крымінальнага кодэкса.

У астатніх сямі ўключаных у спіс судзімасць не пагашаная. Гэта Наталля Варабей, Вольга Фралова, Валянціна Крыштапенка, Аляксандр Мартысевіч, Кірыл Казлоўскі, Вікторыя Пашкевіч, Аляксей Гайдашоў.

Фінансавыя аперацыі асоб, уключаных у “спіс экстрэмістаў”, кантралююцца “з мэтай прадухілення легалізацыі даходаў, атрыманых злачынным шляхам, і фінансавання экстрэмісцкай дзейнасці”.