З 2025 года дзяцей з залежнасцю ад псіхаактыўных рэчываў будуць адпраўляць у спецустановы па заяве бацькоў

6 лістапада, Позірк. З 2025 года па прапанове Генеральнай пракуратуры будзе арганізавана “комплексная рэабілітацыя дзяцей з залежнасцю ад псіхаактыўных рэчываў па заяве бацькоў на базе спецыяльнай выхаваўчай установы” на канфідэнцыйнай аснове, паведаміў генеральны пракурор Андрэй Швед у інтэрв’ю газеце “СБ. Беларусь сегодня”.

“Актуальнай застаецца праблема комплекснага лячэння падлеткаў ад алкагольнай і наркатычнай залежнасці. Раней на першы план выносілася медыцынскі бок пытання — такіх дзяцей лячылі ад дзесяці дзён да месяца. Пры гэтым сацыяльна-педагагічная падтрымка і псіхалагічная дапамога аказваліся не ў поўнай меры”, — сказаў Швед.

Змяшчэнне ў спецустанову стала магчымым без рашэння суда, згодна з прынятым у ліпені законам “Аб змене законаў па пытаннях прафілактыкі безнагляднасці і правапарушэнняў непаўналетніх”. Згодна з дакументам, у спецыяльныя выхаваўчыя ўстановы змяшчаюцца непаўналетнія ва ўзросце ад адзінаццаці да васемнаццаці гадоў, якія маюць патрэбу ў асаблівых умовах выхавання як па рашэнні суда, так і па заяве бацькоў.

У Беларусі ёсць чатыры спецустановы закрытага тыпу для цяжкіх падлеткаў, з іх тры для хлопчыкаў: Магілёўская дзяржаўная спецыяльная школа, Магілёўскае дзяржаўнае спецыяльнае прафесійна-тэхнічнае вучылішча № 2 дрэваапрацоўкі і лячэбна-выхаваўчае Крывіцкае дзяржаўнае спецыяльнае прафесійна-тэхнічнае вучылішча № 3. дзяржаўнае спецыяльнае прафесійна-тэхнічнае вучылішча № 1 лёгкай прамысловасці.

Даныя аб падлеткавай наркаманіі і алкагалізме ў Беларусі ўрыўкавыя або закрытыя. У інфармацыйных матэрыялах сталічных устаноў аховы здароўя гаварылася, што толькі ў Мінскім наркалагічным дыспансеры з прычыны алкагольнай залежнасці на ўліку знаходзяцца 5 тыс. падлеткаў.

Пры гэтым на розных сайтах дзяржведамстваў адзначаецца, што за перыяд 2016–2020 гадоў колькасць непаўналетніх, упершыню ў жыцці ўзятых пад медыцынскае назіранне ў сувязі з ужываннем наркатычных сродкаў са шкоднымі наступствамі, знізілася амаль у пяць разоў.