У кастрычніку рынак легкавых аўтамабіляў устанавіў новы гадавы рэкорд продажаў — БАА
8 лістапада, Позірк. Продажы новых аўтамабіляў праз дылерскія сеткі кампаній, якія ўваходзяць у склад Беларускай аўтамабільнай асацыяцыі, “наглядна прадэманстравалі захаванне тэндэнцыі да росту рынку”, заявіў у традыцыйным месячным аглядзе член праўлення БАА Сяргей Самойла.
Паводле яго слоў, агульная колькасць рэалізаваных удзельнікамі БАА новых легкавых аўтамабіляў у кастрычніку склала амаль 5 тыс. адзінак (дакладная колькасць не прыводзіцца), што “з’яўляецца новым рэкордам продажаў у бягучым годзе”.
За месяц продажы выраслі на 669 адзінак, а ў гадавым вымярэнні (да кастрычніка 2023-га) — больш чым у 2 разы (12 месяцаў таму БАА паведамляла аб рэалізацыі 2.360 новых легкавікоў).
Сумарныя (за студзень — кастрычнік 2024-га) продажы ў гэтым сегменце рынку, як адзначае Самойла, у дачыненні да аналагічнага перыяду 2023 года павялічыліся ў 2,3 разы (абсалютныя лічбы, як і год таму, не прыводзяцца).
Рэалізацыю брэндаў BelGee і Geely прадстаўнік БАА назваў “лакаматывам лавінападобнага росту продажаў” — на іх долю па выніках бягучага года прыпадае 51%.
“У структуры рынку таксама назіраюцца змены. Так, нельга не адзначыць рост продажаў класаў B, SUV B, SUV C і SUV D. У той жа час, можна канстатаваць зніжэнне долі класа С у сукупных продажах”, — адзначыў Самойла.
Новымі мадэлямі, якія дэманструюць “добры старт”, паводле яго слоў, з’яўляюцца электракары Geely E8 і Dongfeng Box (колькі асобнікаў было прададзена, не паведамляецца).
Паводле даных Нацыянальнага статыстычнага камітэта, на рынку легкавых аўтамабіляў працягваецца зніжэнне спажывецкіх цэн. “Такі трэнд у дынаміцы цэн на легкавыя аўтамабілі намеціўся ў Беларусі з траўня бягучага года”, — адзначала раней БАА.
У першы месяц восені дэфляцыя на рынку легкавых аўтамабіляў паскорылася і склала 2,24% з пачатку года.
На фоне “стабілізацыі рознічных цэн” на легкавыя аўтамабілі БАА, як адзначала раней асацыяцыя, “актывізуе дыялог” з уладамі аб “лібералізацыі цэнавага рэгулявання ў галіне ў частцы бонусных выплат пры захаванні гранічных надбавак пры фарміраванні цэн”.
За 2023 год члены БАА прадалі ў краіне 21.761 легкавы аўтамабіль і 3.647 лёгкіх камерцыйных аўто, паведаміў раней на прэс-канферэнцыі дырэктар “БАА-Кансалт” Дзмітрый Ярота. Было рэалізавана 78 мадэляў — на 64 менш (-45,1%), чым у 2022-м (142). Колькасць прадстаўленых марак таксама скарацілася — да 20 (у 2022-м іх налічвалася 28; -28,6%).
Па выніках 2022 года, сведчаць даныя БАА, дылеры прадалі 14.843 легкавых аўтамабіля. Лідзіравалі Geely (4.355), Lada (3.782) і Kia (1.462).
У 2021 годзе ў Беларусі было прададзена 46.837 легкавых аўтамабіляў, у 2020‑м — 53.537, 2019‑м — 64.504.