Коўшык у Кіеве: Лукашэнка толькі перашкаджае аднаўленню адносін паміж беларусамі і ўкраінцамі

11 лістапада, Позірк. Панэльная дыскусія на тэму “Выбары ў Беларусі: што на гарызонце ў 2025 годзе” прайшла ў рамках Украінскага цэнтральнаеўрапейскага форуму, які адбыўся ў Кіеве, паведамляе прэс-служба Аб’яднанага пераходнага кабінета (АПК).

У дыскусіі, якую мадэраваў дырэктар рэгіянальнага офіса “Дыялог Усходняя Еўропа” і прадстаўнік у Беларусі Фонду ім. Фрыдрыха Эберта Крыстафер Форст, прыняла ўдзел прадстаўніца АПК па нацыянальным адраджэнні Аліна Коўшык.

Удзельнікамі таксама былі дэпутат Вярхоўнай Рады, кіраўнік міжфракцыйнага аб’яднання “За дэмакратычную Беларусь” ва ўкраінскім парламенце Аляксей Ганчарэнка (анлайн); старшы навуковы супрацоўнік Інстытута міжнародных адносін і паліталогіі Вільнюскага ўніверсітэта Таццяна Чуліцкая і эксперт праграмы па вывучэнні Расіі і Беларусі Савета па знешняй палітыцы “Украінская прызма” Павел Рад.

Адзначаецца, што Коўшык падчас дыскусіі “патлумачыла, чаму запланаваную рэжымам кампанію перапрызначэння Лукашэнкі нельга нават назваць выбарамі”, “распавяла пра асноўную мэту дыктатара, які імкнецца легітымізаваць свой сёмы незаконны тэрмін на ўзурпаванай пасадзе кіраўніка краіны”, паведаміла пра “новую хвалю рэпрэсій у Беларусі, брутальных затрыманнях і ўжыванні гвалту ў дачыненні да жыхароў Беларусі з боку рэжыму”.

Таксама прадстаўніца АПК “апісала сітуацыю з беларускімі палітвязнямі, якія знаходзяцца без сувязі са знешнім светам” і “прадставіла бачанне, чаму дэмакратычная Беларусь павінна стаць сябрам Украіны і часткай новай архітэктуры бяспекі пасля заканчэння вайны”.

Лукашэнка, паводле яе слоў, “не можа адыгрываць такую ролю”.

Коўшык заявіла аб неабходнасці “аднаўлення добрасуседскіх адносін паміж народамі Беларусі і Украіны”, гаворыцца ў паведамленні прэс-службы кабінета. “Абсалютна відавочна, што Лукашэнка ў гэтай справе не можа нічым дапамагчы. Ён гэтаму толькі перашкаджае”, — сказала палітык.

“Лукашэнка выгнаў многіх прадстаўнікоў беларускай нацыі з Беларусі. Але ў эміграцыі яны гуртуюцца, і гэта дае нам стратэгічную перспектыву. Гуртуюцца беларусы і ўнутры Беларусі. Адбываецца беларускае нацыянальнае адраджэнне. Беларускамоўны “Ютуб” расце, павялічваецца колькасць [гледачоў] і аўдыторыя перадач пра беларускую гісторыю. Праводзяцца мерапрыемствы, гучыць наша мова”, — падкрэсліла Коўшык.

У працы форуму прыняло ўдзел больш за 100 чалавек з 14 краін.