“Вясна”: У Беларусі завочна асуджана 112 чалавек, трое з іх — двойчы

21 лістапада, Позірк. Па палітычна матываваных крымінальных справах у Беларусі на 21 лістапада 2024 года завочна асуджана 112 чалавек, трое з іх — двойчы, паведамляе праваабарончы цэнтр “Вясна”.

Праваабаронцы прыводзяць выпадкі “падвойных” прысудаў.

Старшы дарадца дэмакратычнага лідара Аляксандр Дабравольскі праходзіў па “справе аналітыкаў Ціханоўскай” і “па справе спробы зрыву рэферэндуму”. Усяго яму прызначана 11,5 года пазбаўлення волі. Дабравольскі быў унесены ў пералік грамадзян, якія маюць дачыненне да “экстрэмісцкай дзейнасці”.

Былы супрацоўнік ГУБАЗіК МУС, прадстаўнік аб’яднання былых сілавікоў ByPol Аляксандр Азараў асуджаны па “справе ByPol” і па “справе дыверсіі ў Мачулішчах”. Прыгавораны да 25 гадоў зняволення, унесены ў спіс датычных да “экстрэмісцкай дзейнасці”.

Былы рэстаратар і экс-намеснік камандзіра дабравольніцкага палка “Пагоня” Вадзім Пракоп’еў праходзіў па справе аб падпале дома дэпутата Палаты прадстаўнікоў Алега Гайдукевіча, а таксама пераследваўся, як адзначаецца, “за ўдзел у вайне ва Украіне”. Асуджаны на 25 гадоў зняволення, унесены ў спісы “экстрэмістаў” і “тэрарыстаў”.

Спецыяльная вытворчасць — вытворчасць па крымінальнай справе ў дачыненні да абвінавачанага, які знаходзіцца па-за межамі Беларусі і ўхіляецца ад яўкі ў орган, які вядзе крымінальны працэс. Магчыма па 34 складах злачынстваў, якія пераважна адносяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, найміцтва, здрада дзяржаве, дыверсія, стварэнне экстрэмісцкага фарміравання альбо ўдзел у ім, масавыя беспарадкі, заклікі да санкцый і інш.

Актыўна выкарыстоўваецца для палітычнага пераследу прыхільнікаў перамен і апанентаў улады. Выпадкі не матываванага палітычна выкарыстання інструмента адзінкавыя.

Першыя спецвытворчасці былі адкрытыя 26 верасня 2022 года. У спісе асоб, падвергнутых гэтай працэдуры, на сайце СК налічваецца 121 чалавек.