Сіўчык: У палоне КДБ чатыры экс-байцы палка Каліноўскага

2 снежня, Позірк. “У палоне ў “амерыканцы” (следчым ізалятары КДБ у Мінску) знаходзіцца чатыры былыя байцы палка Кастуся Каліноўскага, які ваюе ва Украіне, заявіў лідар руху салідарнасці “Разам” (“Разам”) Вячаслаў Сіўчык падчас рэгулярнай нядзельнай акцыі пратэсту беларусаў у Варшаве 1 снежня .

Ён не назваў імёнаў затрыманых, але вядома мінімум пра двух вязняў — гэта Васіль Верамейчык і Максім Ралько.

Сітуацыя з Верамейчыкам, паводле слоў аратара, “не адзіны выпадак — беларусы ва Украіне з’яўляюцца ізгоямі”.

Ён лічыць, што таксама ў Літве “штучна” робяць беларусаў ізгоямі: “Гэта найгрубейшае парушэнне канстытуцый Літвы і Украіны і міжнародных пагадненняў”.

“Прапаганда зрабіла вінаватымі беларусаў. Так працягваецца тры гады. Розных гісторый, якія здарыліся з беларусамі ва Украіне ўжо вельмі шмат”, — дадаў палітык.

20 лістапада стала вядома, што ў Беларусь з В’етнама быў дастаўлены былы добраахвотнік, які ваяваў на баку Украіны, 34-гадовы Васіль Верамейчык. У 2020 годзе ён удзельнічаў у пратэстах у Беларусі, затым пераехаў ва Украіну, дзе пасля пачатку поўнамаштабнага ўварвання расейскіх войскаў і стварэння палка Каліноўскага служыў намеснікам камандзіра батальёна “Волат”. У 2024 годзе, пасля заканчэння службы, Верамейчык быў абраны ў Каардынацыйную раду і стаў сузаснавальнікам Асацыяцыі беларускіх ветэранаў.

Верамейчык быў вымушаны пакінуць Літву з-за таго, што яго прызналі пагрозай нацбяспекі (служыў у беларускім войску па кантракце), ён не меў права знаходзіцца на тэрыторыі ЕС.

21 лістапада Дэпартамент дзяржбяспекі Літвы заявіў, што знаходжанне Верамейчыка на тэрыторыі краіны магло “ўяўляць пагрозу нацыянальнай бяспецы”, а спробы “эскалацыі гэтай гісторыі” звонку могуць быць “звычайнай інфармацыйнай атакай на Літву”.

Праваабарончая супольнасць прызнала Верамейчыка палітычным зняволеным.

Аб тым, што Ралько знаходзіцца ў зняволенні ў Беларусі, стала вядома 20 лістапада. Кадры з ім з месцаў ізаляцыі былі паказаныя ў прапагандысцкім фільме тэлеканала АНТ “Бесы. Як жадаюць захапіць Беларусь”.

Калі і якім чынам Ралько патрапіў у Беларусь, калі і пры якіх абставінах затрыманы, у якім статусе знаходзіцца, у фільме не паведамлялася.

Інфармацыі аб ягоным затрыманні раней не было.

Сцвярджалася, што Ралько, які нарадзіўся ў Мінску ў 2001 годзе, далучыўся да ПКК у 2022-м.

На відэазапісе экс-баец кажа, што мэта палка Каліноўскага — “зайсці ў Беларусь”.

Рэжым Аляксандра Лукашэнкі прызнаў ПКК “тэрарыстычнай арганізацыяй”.