За Лукашэнку аддадзена рэкордныя 2,5 млн подпісаў, сцвярджае Круты
8 снежня, Позірк. У падтрымку вылучэння Аляксандра Лукашэнкі на сёмы прэзідэнцкі тэрмін сабрана 2,5 млн подпісаў выбаршчыкаў, сцвярджае кіраўнік ягонай адміністрацыі Дзмітрый Круты.
Пра гэта, паводле паведамленняў дзяржСМІ, ён заявіў 7 снежня на канцэрце “Час выбраў нас” у рамках “рэспубліканскай грамадска-культурнай акцыі “Марафон адзінства” ў Оршы (Віцебская вобласць).
На выбарах 2020 года, паводле афіцыйных даных, за Лукашэнку нібыта было аддадзена каля 2 млн подпісаў, 2015-га — амаль 1,8 млн, 2010 — каля 1,4 млн, 2006 — амаль 2 млн, 2001 — каля 400 тыс. Гэта найвышэйшыя паказчыкі ў кожнай выбарчай кампаніі.
На першых прэзідэнцкіх выбарах 1994 года ён сабраў больш за 150 тыс. подпісаў. Па іх колькасці яго тады апярэдзілі такія кандыдаты, як Васіль Новікаў (больш за 180 тыс.), Зянон Пазьняк (звыш 215 тыс.) і Вячаслаў Кебіч (больш за 370 тыс.).
Працэс падрыхтоўкі да сёмых прэзідэнцкіх выбараў, прызначаных на 26 студзеня 2025 года, праходзіць пад кантролем уладаў, палітычнае поле краіны зачышчанае ад актыўных апанентаў Лукашэнкі. Прадстаўнікі беларускіх дэмакратычных сілаў за мяжой называюць тое, што адбываецца, “спецаперацыяй па ўтрыманні ўлады”, праваабаронцы ўказваюць на імітацыю канкурэнцыі.
Згодна з Выбарчым кодэксам, для ўдзелу ў выбарах прэзідэнта неабходна сабраць не менш як 100 тыс. подпісаў у падтрымку кандыдатуры.
У этапе збору подпісаў, які завяршыўся 6 снежня, удзельнічалі ініцыятыўныя групы Лукашэнкі, кіраўнікоў праўладных Ліберальна-дэмакратычнай партыі Алега Гайдукевіча, Рэспубліканскай партыі працы і справядлівасці Аляксандра Хіжняка, Камуністычнай партыі Беларусі Сяргея Сыранкова і былога сябра Аб’яднанай грамадзянскай партыі, дэпутата Палаты прадстаўнікоў 2019 гадах Ганны Канапацкай. Адкрыта падтрымліваюць Лукашэнку ўсё, акрамя Канапацкай.
Пра тое, што за вылучэнне Лукашэнкі сабрана больш за 1,5 млн подпісаў, заявіў кіраўнік ягонай ініцыятыўнай групы, старшыня праўладнай Федэрацыі прафсаюзаў Юры Сянько 21 лістапада.
На наступны дзень аб пераадоленні 100-тысячнага бар’ера заявіў Гайдукевіч.
Іншыя патэнцыйныя кандыдаты лічбаў не называлі.