Рада БНР: Дагавор аб гарантыях бяспекі з РФ неабавязковы для выканання пасля дэмакратычных перамен у Беларусі

8 снежня, Позірк. Падпісаўшы двухбаковы дагавор аб гарантыях бяспекі, Аляксандр Лукашэнка і прэзідэнт РФ Уладзімір Пуцін “адзначылі юбілей стварэння так званай Саюзнай дзяржавы”, гаворыцца ў заяве Рады Беларускай Народнай Рэспублікі.

“Нягледзячы на тое, што гэта “дзяржава” носіць фіктыўны характар, яна тым не менш была падставай для далейшай паўзучай анэксіі Беларусі Расіяй, пазбаўлення краіны ўсё большых элементаў дзяржаўнасці”, — адзначае Рада БНР.

“У 1999 годзе, — падкрэсліваецца ў заяве, — Рада БНР выступіла супраць таго дагавора [аб стварэнні Саюзнай дзяржавы], які Васіль Быкаў у дзень яе падпісання назваў “злачынствам стагоддзя”, і заявіла, што Лукашэнка не меў ніякага легітымнага права выступаць ад імя беларускага народа — пасля таго, як у 1995–96 гадах ён здзейсніў антыканстытуцыйны пераварот”.

Канстатаваўшы, што пасля 2020 года Лукашэнка “не прызнаецца большасцю беларускага народа і дэмакратычнымі дзяржавамі свету як асоба, якая легітымна займае пасаду прэзідэнта Беларусі”, Рада БНР заяўляе, што ён з Пуціным “падпісаў пагадненне, якое яшчэ больш замацоўвае краіну ў арбіце вайсковых інтарэсаў Масквы”.

“Гэты дагавор, акрамя іншага, абавязвае Беларусь падтрымліваць Расію ў тым ліку і вайсковымі спосабамі, як тэхнікай, так і жыццямі вайскоўцаў з Беларусі”, — гаворыцца ў публікацыі.

Падкрэсліваецца, што “нават у выпадку смерці Лукашэнкі або яго адхілення ад улады” Расія, паводле дагавору, “мае магчымасць патрабаваць ад Мінска накіравання беларусаў ва ўсе тыя месцы, дзе яна ажыццяўляе агрэсію” і дзе “беларускія жаўнеры і афіцэры стануць гарматным мясам”.

“Размяшчэнне ж на тэрыторыі Беларусі расійскай ядзернай зброі аўтаматычна робіць краіну мішэнню з боку тых, супраць каго можа быць накіраваная гэтая зброя”, — сцвярджае Рада БНР.

Гэта, на думку аўтараў заявы, — “плата беларусаў за імкненне Лукашэнкі з дапамогай Масквы захаваць уладу”.

Рада заяўляе, што Лукашэнка “не мае юрыдычнага права падпісваць ніякія дакументы ад імя беларускай дзяржавы”. З прычыны гэтага “такія пагадненні не будуць абавязковыя для дэмакратычнай беларускай дзяржавы ў будучыні, а стануць прадметам перагляду і магчымай адмены або карэкцыі”, рэзюмуецца ў заяве.

Дагавор аб гарантыях бяспекі, аб падпісанні якога паведамлялася 6 снежня падчас візіту ў Мінск Пуціна, паводле слоў прэзідэнта РФ, “вызначае ўзаемныя саюзніцкія абавязацельствы па забеспячэнні абароны, абарону суверэнітэту, незалежнасці і канстытуцыйнага ладу” дзвюх краін.

Паводле сцвярджэння Пуціна, таксама гаворка ідзе пра “цэласнасць і недатыкальнасць тэрыторыі і знешняй мяжы Саюзнай дзяржавы, прычым з задзейнічаннем усіх наяўных сіл і сродкаў”.

Расійскі прэзідэнт 6 снежня чарговым разам нагадаў, што “гаворка ў тым ліку ідзе і аб расійскай тактычнай ядзернай зброі”, размешчанай, “на прапанову” Лукашэнкі на тэрыторыі Беларусі. Ён зноў паўтарыў тэзіс аб магчымасці яе выкарыстання “ў абарончых мэтах у адказ на магчымы напад з ужываннем зброі масавага паражэння або пры адбіцці агрэсіі з ужываннем звычайнай зброі, але якая стварае крытычную пагрозу для суверэнітэту або тэрытарыяльнай цэласнасці”.

7 снежня аб’яднанне былых сілавікоў BelPol заявіла, што дагавор дазваляе адпраўляць беларусаў на вайну ва Украіну і ствараць у Беларусі расійскія вайсковыя базы.

Структура сцвярджае, што ёй удалося атрымаць тэкст гэтага дакумента, але не публікуе яго цалкам, каб абараніць крыніцу.

Згодна з дакументам, як заяўляецца, бакі дагавора павінны “неадкладна даць адзін аднаму ваенную, ваенна-тэхнічную і іншую дапамогу і выкарыстоўваць <…> усе сілы і сродкі” ў выпадку “пагрозы суверэнітэту, тэрытарыяльнай цэласнасці, знешняй мяжы Саюзнай дзяржавы, канстытуцыйнаму ладу” Расіі і Беларусі “з боку трэціх дзяржаў, іх аб’яднанняў, тэрарыстычных і экстрэмісцкіх арганізацый і груп”.

BelPol, які раней усумніўся ў наяўнасці расійскай тактычнай ядзернай зброі ў Беларусі, дапусціў што неўзабаве яна можа з’явіцца. У згаданым дагаворы, паводле інфармацыі гэтай структуры, зброя масавага паражэння называецца “ядзернай зброяй Расійскай Федэрацыі”.