Прадпрыемствы АПК не своечасова разлічваюцца за ўгнаенні і зрываюць пастаўкі — дакумент

Апублікавана на адкрытай версіі “Позірку” 10 снежня ў 10:46.

9 снежня, Позірк. Прадпрыемствы аграпрамысловага комплексу (АПК) маюць пратэрмінаваныя запазычанасці за атрыманыя ад вытворцаў мінеральныя ўгнаенні, а таксама сістэматычна парушаюць графікі іх паставак, вынікае з ліста старшыні канцэрна “Белнафтахім” Андрэя Рыбакова Савету міністраў.

Дакумент прадаставіла “Позірку“ аб’яднанне былых сілавікоў BelPol.

Ліст напісаны на фірменным бланку канцэрна ў верасні гэтага года (дата і подпіс адсутнічаюць). На той момант Рыбакоў яшчэ не быў прызначаны генеральным дырэктарам ААТ “Беларуськалій” (гэта адбылося 4 лістапада).

Спасылаючыся на адпаведныя даручэнні ўрада, тагачасны кіраўнік “Белнафтахіма” нагадвае, што “старшыням аблвыканкамаў неабходна забяспечыць безумоўнае выкананне” рашэнняў аб “пагашэнні пратэрмінаванай запазычанасці за пастаўленыя раней мінеральныя ўгнаенні” і “своечасовай выбарцы устаноўленых графікамі аб’ёмаў мінеральных угнаенняў”.

Нягледзячы на гэта, наракае Рыбакоў, зацверджаныя Міністэрствам сельскай гаспадаркі і харчавання тэрміны выплаты даўгоў на 1 верасня 2024 года выкананы арганізацыямі АПК “не ў поўным аб’ёме”.

“Так, графік пагашэння запазычанасці за азотныя ўгнаенні, які прадугледжвае яе пагашэнне ўсімі абласцямі да 01.08.2024, не выкананы Гомельскай, Магілёўскай і Віцебскай абласцямі. У жніўні 2024 года пратэрмінаваная запазычанасць Гомельскай вобласцю пагашаная цалкам, Магілёўскай вобласцю — зніжаная з 11 млн 16,1 тыс. рублёў да 3 млн 730 тыс., Віцебскай вобласцю — захаваная на ўзроўні 01.08.2024 у памеры 1 млн 767,7 тыс. рублёў”, — гаворыцца ў дакуменце.

Што тычыцца фосфарных угнаенняў, то, як інфармуе Рыбакоў, графік пагашэння запазычанасцяў за іх пастаўкі на 1 верасня цалкам выкананы Брэсцкай, Гродзенскай і Магілёўскай абласцямі. Пры гэтым Гомельскай вобласцю графік выкананы на 98,4%, Мінскай — на 92,4%, Віцебскай — на 55,4%.

“Усяго на 01.09.2024 сума запазычанасці за адгружаныя раней азотныя і фосфарныя ўгнаенні складае 124,4 млн. рублёў (рост на працягу жніўня на 11,9 млн. рублёў), з якой 70,5 млн. рублёў — пратэрмінаваная (зніжана на працягу жніўня на 4,2 млн. рублёў)”, — падкрэслівае кіраўнік канцэрна.

Таксама ў лісце звяртаецца ўвага на зрыў прадпрыемствамі графікаў паставак угнаенняў.

“Графік пастаўкі азотных угнаенняў суб’ектам, якія ажыццяўляюць дзейнасць у галіне аграпрамысловай вытворчасці, <…> у ліпені 2024 года выкананы на 29,2%, у жніўні — на 42,5%, у студзені — жніўні — на 74,3%”, — прыводзіць статыстыку кіраўнік “Белнафтахіма”.

Прычынай невыканання графіка ён называе “недастатковую колькасць заявак на пастаўку азотных угнаенняў, пацверджаных фінансаваннем”.

Графік паставак фосфарных угнаенняў у студзені — жніўні быў выкананы на 78,8% (у ліпені — на 108,2%, у жніўні — 124,9%), вынікае з дакумента.

“Высокі ўзровень запазычанасці за адгружаемыя вытворцамі мінеральныя ўгнаенні на ўмовах адтэрміноўкі аплаты вельмі негатыўна адбіваецца як на бягучай, так і інвестыцыйнай дзейнасці прадпрыемстваў”, — адзначаецца ў лісце.

Падкрэсліваецца, што “сістэматычнае невыкананне арганізацыямі аграпрамысловага комплексу рэспублікі графіка пастаўкі азотных угнаенняў таксама негатыўна адбіваецца на выкананні ўстаноўленага ўрадам задання канцэрну па мэтавым паказчыку па вытворчасці ў 2024 годзе азотных угнаенняў”.

Рыбакоў паведамляе, што “з улікам невыканання графіка паставак азотных угнаенняў у студзені — жніўні <…> аб’ём не выбраных азотных угнаенняў складае 126,6 тыс. тон у д.р.” (“дзеючае рэчыва” — можа быць у разы меншым за агульную фізічную масу. — “Позірк”.).

“На падставе выкладзенага” кіраўнік “Белнафтахіма” “настойліва” папрасіў урад прыняць меры па выпраўленні сітуацыі.

Чыноўнік хадайнічаў аб тым, каб па распараджэнні Саўміна кіраўнікі адпаведных аблвыканкамаў забяспечылі пагашэнне запазычанасцяў перад вытворцамі азотных і фосфарных угнаенняў — ААТ “Гродна Азот” і ААТ “Гомельскі хімічны завод”.

Акрамя гэтага, Рыбакоў папрасіў, каб кіраўнікі рэгіёнаў ліквідавалі парушэнні графікаў паставак угнаенняў і забяспечылі іх “выбарку” сельгаспрадпрыемствамі ў неабходных аб’ёмах.

У распараджэнні “Позірку” ёсць адказ на ліст Рыбакова. Ён напісаны намеснікам прэм’ер-міністра Юрыем Шулейка.

Віцэ-прэм’ер даручыў старшыням аблвыканкамаў забяспечыць “строгае выкананне графікаў пагашэння пратэрмінаванай запазычанасці за пастаўленыя раней мінеральныя ўгнаенні ў поўным аб’ёме”, а таксама гарантаваць “своечасовую выбарку мінеральных угнаенняў згодна з устаноўленым графікам”.