Амбасада Японіі пацвердзіла затрыманне ў Беларусі другога свайго суайчынніка
18 снежня, Позірк. Амбасада Японіі ў Беларусі пацвердзіла затрыманне другога свайго суайчынніка, паведамляе The Asahi Shimbun Company.
Адзначаецца, што дыпмісія звярнулася з гэтай нагоды ў Міністэрства замежных спраў Беларусі, адказ з ведамства атрыманы 16 снежня.
“Амбасада заявіла, што не можа выдаваць імя затрыманага і выстаўленыя супраць яго абвінавачванні”, — гаворыцца ў публікацыі.
Пра затрыманне ў Беларусі другога грамадзяніна Японіі стала вядома 3 снежня.
“Супольнасць чыгуначнікаў Беларусі” паведаміла, што 1 снежня машыніст цягніка рэгіянальных ліній Калінкавічы — Лунінец падчас руху на восьмым пікеце 407-га кіламетра перагону Калінкавічы-Заходнія — раз’езд Клінск (Гомельская вобласць) заўважыў мужчыну, які здымаў на відэакамеру аўтадарожны мост на трасе М10 Гомель — Кобрын.
Інфармацыю пра гэта машыніст перадаў цягніковаму дыспетчару, які ў сваю чаргу — бліжэйшаму да месца здарэння атраду ваенізаванай аховы і райаддзелу міліцыі.
Заяўлялася, што “дадзенае здарэнне з’яўляецца ўжо трэцім у чарадзе падобных здарэнняў, якія носяць “адценне шпіёнаманіі”, якія адбыліся на БЧ за адносна непрацяглы перыяд часу”.
Адно з такіх здарэнняў было звязана з выяўленнем падводнага плыўца ў ахоўнай зоне чыгуначнага моста, другое — з затрыманнем старонняга, які меў пры сабе спецыялізаванае радыёабсталяванне, на закрытай тэрыторыі прадпрыемства БЧ.
Афіцыйнага пацверджання факту затрымання беларускія ведамствы дагэтуль не прадставілі.
Раней паведамлялася пра затрыманне ў Беларусі па абвінавачанні ў “агентурнай дзейнасці” грамадзяніна Японіі Наканісі Масатосі.
5 верасня ў рэпартажы “Правал “самурая” з Токіа” на тэлеканале “Беларусь 1” начальнік Следчага ўпраўлення КДБ Канстанцін Бычак паведаміў, што згаданы падданы Японіі затрыманы па падазрэнні ў супрацоўніцтве з замежнай разведкай.
Паводле сцвярджэння Бычака, Наканісі, знаходзячыся на тэрыторыі Беларусі, ажыццяўляў збор і перадачу ў адрас японскай спецслужбы “выведніцкай інфармацыі ваеннага характару, у прыватнасці, аб беларускай ваеннай інфраструктуры, аб перамяшчэнні войскаў і ваеннай тэхнікі, аб бягучай сітуацыі на паўднёвым напрамку”.
У рэпартажы сказана, што Наканісі пераехаў у Гомель у 2018 годзе.
З Гомеля ён нібыта ездзіў у раён беларуска-ўкраінскай мяжы, дзе “здымаў дарогі, масты, стратэгічныя аб’екты, кшталту вакзалаў ці аэрапортаў, інфраструктуру ваенных аб’ектаў, а таксама чыгуначныя пуці, напрыклад там, дзе ляжаць вузкакалейныя рэйкі”.
Сцвярджаецца, што падазраваны за шэсць гадоў жыцця ў Беларусі зрабіў больш за 9 тыс. “дакладных фатаграфій з беларуска-ўкраінскага памежжа”, якія ён “баяўся перадаваць па інтэрнеце, а хацеў выключна асабіста, у рукі” куратарам пасля прыбыцця ў Японію.