У спіс “экстрэмістаў” дададзена 29 чалавек

20 снежня, Позірк. У пералік “асоб, якія маюць дачыненне да экстрэмісцкай дзейнасці”, 20 снежня дададзена яшчэ 29 чалавек.

Цяпер у дакуменце на сайце Міністэрства ўнутраных спраў 4.795 пазіцый.

Усе ўнесеныя ў абноўлены спіс грамадзяне асуджаныя па крымінальных артыкулах, якія ўлады выкарыстоўваюць для палітычнага пераследу.

У спіс дададзеныя прызнаныя палітвязнямі Ірына Мазоль, Зміцер Голуб, Ала Дзесяцік, Аляксей Кісялёў і Яўген Катляроў (вядомы пад псеўданімам Яўген Какойта, раней ладзіў правакацыі супраць незалежных СМІ).

З адзнакай “Адбывае пакаранне” ў спіс унесеныя таксама Ігар Губарэвіч, Марына Баярчук, Алена Варашкевіч, Аляксандр Салаўёў, Таццяна Ярмольчык, Раман Усманаў, Мікалай Пятровіч, Ігар Ільюкевіч і Ігар Гарачка.

МУС працягвае практыку ўнясення ў спіс з адзнакай “Адбывае пакаранне” людзей, асуджаных завочна. На гэты раз размова ідзе пра заснавальніка медычнага цэнтра “Новы зрок” Алега Каўрыгіна.

Таксама ў спісе Уладзімір Гардзіенка, Маргарыта Важдаева, Дзяніс Прывалаў, Кірыл Жукоўскі, Ягор Раманаў, Іна Усманава, Ганна Усманава, Кірыл Селязнёў, Анжэла Амельянюк, Юлія Дзярнейка, Кірыл Амельянюк, Андрэй Раманцоў, Аляксей Саламаненка і Тарас Левін, судзімасць якіх не пагашаная. Як правіла, такая фармулёўка сведчыць аб вынясенні прысуду, не звязанага з пазбаўленнем волі.

Згодна ч. 3 і 4 арт. 18 закона “Аб супрацьдзеянні экстрэмізму”, грамадзянам, у адносінах да якіх маецца прыгавор, які набыў моц, да пагашэння або зняцця судзімасці і на працягу пяці гадоў пасля пагашэння або зняцця судзімасці забараняецца займацца дзейнасцю, звязанай з абарачэннем наркатычных сродкаў, псіхатропных рэчываў, іх прэкурсораў, зброі і боепрыпасаў, выбуховых рэчываў, педагагічнай, выдавецкай дзейнасцю, займаць дзяржаўныя пасты, праходзіць ваенную службу.

Фінансавыя аперацыі ўключаных у спіс “экстрэмістаў” грамадзян падлягаюць асабліваму кантролю.