Малалетняе дзіця загінула ў выніку аўтамабільнай аварыі ў Віцебскай вобласці

3 студзеня, Позірк. Малалетняе дзіця загінула ў выніку аўтамабільнай аварыі ўвечары 2 студзеня ў Віцебскай вобласці, паведамляе прэс-служба Міністэрства ўнутраных спраў.

Адзначаецца, што трагедыя адбылася на 124-м кіламетры аўтадарогі М-8 (Віцебск — Орша). Папярэдне, 38-гадовы кіроўца “Фальксвагена” не даў рады кіраванню і праз паласу сустрэчнага руху з’ехаў у кювет, аўтамабіль перакуліўся.

34-гадовая жонка кіроўцы атрымала траўмы, іх паўтарагадовая дачка загінула.

“Паводле папярэдняй інфармацыі, спадарожнай прычынай здарэння мог стаць гранічны знос задніх шын аўтамабіля, — гаворыцца ў паведамленні. — На месцы здарэння працуюць супрацоўнікі ДАІ, следча-аператыўная група”.

МУС нагадала, што ездзіць на аўтамабілі без зімовых шын або з моцна зношанымі пратэктарамі забаронена. Кіроўцам варта выбіраць “бяспечную хуткасць, якая адпавядае умовам надвор’я і дарожным умовам, не здзяйсняць рэзкіх манеўраў”. Усе людзі ў салоне павінны быць прышпіленыя рамянямі бяспекі, а дзеці павінны быць у замацаваных “адмысловых утрымальных прыладах”.