ДТЗ у Астравецкім раёне — загінула 36-гадовая жанчына, пяцёра дзяцей у бальніцы (дапоўнена)

Дададзеныя абзацы 7–10.

5 студзеня, Позірк. Аб дарожна-транспартным здарэнні са смяротным зыходам у Астравецкім раёне (Гродзенская вобласць) паведаміў 5 студзеня Следчы камітэт.

Паводле папярэдняй інфармацыі, каля 16 гадзін каля вёскі Вераб’і 36-гадовая кіроўца аўтамабіля “Фальксваген” не справілася з кіраваннем, выехала на сустрэчную паласу, дзе сутыкнулася з іншамаркай “Ровер”.

Жанчына загінула.

Адзначаецца, што, акрамя яе, у аўтамабілі знаходзілася шэсць чалавек, пяцёра з якіх — непаўналетнія.

“Дзеці і кіроўца другой машыны дастаўленыя ў бальніцу”, — гаворыцца ў паведамленні.

На месцы здарэння працуе следча-аператыўная група. Узбуджана крымінальная справа паводле ч. 2 арт. 317 КК (парушэнне правілаў дарожнага руху, якое пацягнула па неасцярожнасці смерць чалавека).

Як паведаміла Міністэрства аховы здароўя, пяцёра пацярпелых у ДТЗ дзяцей шпіталізаваныя ў Астравецкую цэнтральную райбальніцу, у іх дыягнаставаныя спалучаныя траўмы.

Чацвёра дзяцей змешчана ў аддзяленне анестэзіялогіі і рэанімацыі, адно — у траўматалагічнае аддзяленне.

“На дапамогу астравецкім урачам выехалі эксперты рэспубліканскага ўзроўню — хірург, нейрахірург, анестэзіёлаг-рэаніматолаг і траўматолаг, а таксама абласныя спецыялісты — анестэзіёлаг-рэаніматолаг, хірург, уролаг. Пасля правядзення агляду і медычнага кансіліуму з удзелам рэспубліканскіх спецыялістаў будзе прынята рашэнне аб далейшай тактыцы лячэння пацыентаў”, — адзначылі ў ведамстве.

Узрост дзяцей не паведамляецца.