Істотна знізіўся паток жыхароў краін Еўропы, якія наведваюць Беларусь на падставе бязвізу

8 студзеня, Позірк. З 30 снежня 2024 года па 8 студзеня 2025 года Беларусь у бязвізавым рэжыме наведала 3.769 жыхароў еўрапейскіх краін (23–30 снежня — 6.140), вынікае з інфармацыі Дзяржаўнага пагранічнага камітэта.

У краіну накіравалася 1.109 грамадзян і неграмадзян Латвіі (за папярэдні справаздачны перыяд — 2.319), 1.749 грамадзян Літвы (1.891), 459 грамадзян Польшчы (473) і 452 грамадзяніны з ліку прадстаўнікоў іншых еўрапейскіх дзяржаў (1.457).

З 15 красавіка 2022 года Беларусь наведала 1.034.194 жыхары Еўропы. З Латвіі прыбыло 325.855, Літвы — 588.131, Польшчы — 104.210. З 19 ліпеня 2024-га ў краіну накіравалася 15.998 чалавек з 35 краін, уключаных у спіс “пашыранага бязвізу”.

Бязвізавы рэжым дзейнічае з 15 красавіка 2022 года для жыхароў Латвіі і Літвы, з 1 ліпеня таго ж года — для жыхароў Польшчы. 19 ліпеня 2024 года беларускія ўлады распаўсюдзілі бязвізавы рэжым на грамадзян яшчэ 35 краін Еўропы.

Гаворка пра жыхароў Аўстрыі, Андоры, Бельгіі, Балгарыі, Босніі і Герцагавіны, Ватыкана, Вялікабрытаніі, Венгрыі, Германіі, Грэцыі, Даніі, Ірландыі, Ісландыі, Іспаніі, Італіі, Кіпра, Ліхтэнштэйна, Люксембурга, Мальты, Манака, Нідэрландаў, Нарвегіі, Партугаліі, Румыніі, Сан-Марына, Паўночнай Македоніі, Славакіі, Славеніі, Фінляндыі, Францыі, Харватыі, Чэхіі, Швейцарыі, Швецыі і Эстоніі.

Грамадзяне гэтых дзяржаў могуць уязджаць у Беларусь без візы праз усе наземныя і паветраныя міжнародныя пункты пропуску “на падставе сапраўдных дакументаў”, знаходзіцца на беларускай тэрыторыі “не больш за 30 сутак з дня ўезду”.

13 снежня 2024 года бязвіз для жыхароў 38 еўрапейскіх краін падоўжаны да канца 2025-га.