Мігрант з Індыі падвергнуўся катаванням у лесе на тэрыторыі Беларусі — СМІ
8 студзеня, Позірк. Паліцыя індыйскага штата Хар’яна распачала крымінальную справу ў дачыненні да турыстычнай кампаніі з Пацьялы (штат Пенджаб) у сувязі са зваротам сваякоў Маджыда Ахмада, якому згаданай турфірмай было абяцана садзейнічанне ў ажыццяўленні міграцыі ў Германію праз Расію і Беларусь, паведаміла выданне The Indian Express.
Ахмад праходзіць па справе ў якасці пацярпелага.
Адзначаецца, што кампанія папрасіла за свае паслугі 850 тыс. індыйскіх рупій (каля 9,9 тыс. долараў), з якіх 400 тыс. былі ўнесеныя мужчынам у якасці платы за расійскую візу. Астатнюю суму ён павінен быў выплаціць пасля прыбыцця ў Германію.
Паводле слоў бацькі мігранта, 12 жніўня 2024 года той прыляцеў у Расію, праз шэсць дзён сувязь з ім была страчаная.
Сям’я звязалася з прадстаўнікамі турфірмы 19 жніўня і атрымала запэўніванні, што з Ахмадам “усё ў парадку і яго хутка адправяць у Германію”, гаворыцца ў публікацыі. “29 жніўня агенты злучылі мяне з Маджыдам па тэлефоне. Маджыд папрасіў нас выплаціць астатнюю суму турагентам, заявіўшы, што знаходзіцца ў Германіі”, — сказаў бацька пацярпелага, удакладніўшы, што пасля гэтага ён пералічыў кампаніі 450 тыс. рупій.
“12 верасня 2024 года мне патэлефанаваў Маджыд з невядомага нумара. Ён сказаў, што нейкія людзі з турыстычных агенцтваў адвезлі яго ў лясы Беларусі, дзе ён быў закладнікам. Маджыда збілі, катавалі падпаленымі цыгарэтамі і трымалі галодным. Ён распавёў нам, што раней не хацеў прыязджаць у Германію праз страх. Выкрадальнікі таксама выхапілі ў яго 700 долараў і кінулі яго ў лесе. Нейкія людзі адвезлі яго ў мясцовую бальніцу”, — цытуе The Indian Express бацьку пацярпелага.
Паведамляецца, што пазней сям’я аплаціла авіябілет, і 21 верасня 2024 года мужчына вярнуўся ў Індыю. Праз шэсць дзён сваякі звярнуліся ў паліцыю. Справа была распачатая 6 студзеня 2025 года.
Міграцыйны крызіс на мяжы Беларусі і краін ЕС працягваецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.
Беларускія ўлады рэгулярна паведамляюць пра пакуты, фізічныя траўмы і гібель замежнікаў на мяжы з краінамі ЕС, нязменна ўскладаючы адказнасць за гэта на супрацоўнікаў сілавых ведамстваў Польшчы, Літвы і Латвіі. Пры гэтым беларускі бок не паведамляе, як мігранты аказваюцца на мяжы з краінамі ЕС у зоне адказнасці пагранічнага ведамства.
Паводле даных дакладу “Бяспечнага шляху няма. Смерці мігрант_ак на мяжы Еўрапейскага саюза і Беларусі” праваабарончай арганізацыі Human Constanta, з вясны 2021-га па канец сакавіка 2024-га не менш за 116 нелегальных мігрантаў, у тым ліку 15 жанчын, памерла на мяжы Беларусі з краінамі ЕС. Непасрэдна на тэрыторыі Беларусі на канец сакавіка 2024 года памерла не менш за 47 чалавек.
З 2021 года на мяжы Беларусі з краінамі Еўрапейскага саюза загінулі 72 мігранты, паведаміў 19 снежня 2024 года намеснік начальніка галоўнага ўпраўлення аператыўна-вышуковай дзейнасці Дзяржаўнага пагранічнага камітэта (ДПК) Мікалай Барэйка. Адказнасць за гэта ён усклаў на “калегаў з сумежных дзяржаў”.