Туск на сустрэчы з Ціханоўскай заявіў пра прыярытэт Беларусі падчас польскага старшынства ў ЕС

8 студзеня, Позірк. Беларусь будзе “прыярытэтным напрамкам” у перыяд старшынства Варшавы ў ЕС, заявіў польскі прэм’ер-міністр Дональд Туск 8 студзеня на сустрэчы з дэмакратычным лідарам Святланай Ціханоўскай.

Сустрэча прайшла ў Варшаве і працягвалася адну гадзіну, паведаміла ў сваім тэлеграм-канале беларускі палітык.

Сярод іншага, паводле слоў Ціханоўскай, бакі абмеркавалі праблемы, з якімі ў Польшчы сутыкаюцца беларусы, “магчымасці пашырэння выдачы віз”, шляхі вызвалення журналіста Анджэя Пачобута і ўсіх палітвязняў у Беларусі, сітуацыю на беларуска-польскай мяжы.

“Адбылася вельмі цёплая і плённая сустрэча ў фармаце тэт-а-тэт. Удзячная польскаму ўраду і прэм’еру Туску за цвёрдую падтрымку беларусаў і паслядоўную пазіцыю ў дачыненні да рэжыму Лукашэнкі. Наша супрацоўніцтва — гэта не толькі знак салідарнасці, але і ўклад у агульную барацьбу за свабоду і дэмакратыю ў рэгіёне”, — адзначыла дэмлідар.

Трохдзённы візіт Ціханоўскай у Польшчу пачаўся 8 студзеня.

Польшча старшынюе ў Савеце Еўрапейскага саюза ў першым паўгоддзі 2025 года.