Намеснік кіраўніка МЗС Лукашэвіч сустрэўся ў Кабуле з прадстаўніком “Талібану”, якога беларускія ўлады лічаць датычным да тэрарызму

12 студзеня, Позірк. Першы намеснік міністра замежных спраў Сяргей Лукашэвіч сустрэўся ў Кабуле з намеснікам кіраўніка МЗС Афганістана, прадстаўніком кіруючага ў гэтай краіне радыкальнага руху “Талібан” Шэрам Мухамадам Абасам Станікзаем.

“На сустрэчы абмяркоўваліся эканамічная і палітычная агульнасць і іншае сумеснае супрацоўніцтва паміж Афганістанам і Беларуссю”, — гаворыцца ў паведамленні афганскага знешнепалітычнага ведамства.

Станікзай, як заяўляецца, назваў візіт беларускага дыпламата “важнай падзеяй у двухбаковых адносінах Беларусі і Афганістана”, а таксама “добрым пачаткам доўгатэрміновага супрацоўніцтва”.

Лукашэвіч на сустрэчы падкрэсліў “пазітыўны намер свайго ўрада <…> закласці аснову супрацоўніцтва з Афганістанам у розных галінах”.

“Бакі дамовіліся, што тэхнічныя групы працягнуць перамовы ў Кабуле”, — адзначаецца ў рэлізе.

Беларускі МЗС пра візіт Лукашэвіча ў Афганістан не паведамляў.

Партал reform.news звярнуў увагу, што Станікзай уключаны Камітэтам дзяржбяспекі Беларусі ў спіс “асоб, якія маюць дачыненне да тэрарыстычнай дзейнасці”.

Станікзай нарадзіўся ў 1963 годзе, ваяваў супраць арміі СССР падчас савецкага-афганскай вайны 1979–1989 гадоў. Працаваў намеснікам кіраўніка МЗС падчас першага праўлення “Талібана” ў Афганістане (1996–2001).

Другое праўленне талібаў пачалося ў 2021 годзе пасля вываду з Афганістана ваеннага кантынгенту ЗША.

“Талібан” — ісламісцкі рэлігійна-палітычны ваенізаваны рух. Прызнаны тэрарыстычнай арганізацыяй у Кыргызстане, Таджыкістане, Турцыі, Канадзе, Расіі.

Пры гэтым расійскія ўлады адкрыта супрацоўнічаюць з талібамі пасля іх вяртання да ўлады.