Грамадзяніна Эстоніі амаль год утрымліваюць за кратамі ў Беларусі — праваабаронцы

16 студзеня, Позірк. Грамадзяніна Эстоніі Алана Роя са студзеня 2024 года ў Беларусі ўтрымліваюць у следчым ізалятары — нібыта за дачыненне да дзейнасці “экстрэмісцкага фарміравання”, паведамляе праваабарончы цэнтр “Вясна”.

Летась 16 студзеня Камітэт дзяржбяспекі прызнаў “экстрэмісцкім фарміраваннем” арганізацыю Fund of Belarus Friend LTD. У рашэнні фігуравалі людзі, якіх ведамства лічыць датычнымі да “фарміравання” — беларусы Алег Стэфановіч і Аляксандр Сырыца, а таксама эстонец Алан Роя.

Паводле інфармацыі праваабаронцаў, замежніку інкрымінуюць ч. 1 арт. 361¹ КК (стварэнне экстрэмісцкага фарміравання або ўдзел у ім). Дэталі справы невядомыя.

Фонд Fund of Belarus Friend LTD заснаваны для дапамогі пацярпелым ад палітычных рэпрэсій у Беларусі. Яго інтэрнэт-рэсурсы не абнаўляюцца з 2021 году.

У 2022–2023 гадах контрвыведка КДБ затрымала 16 замежнікаў, заяўляў летась у лютым кіраўнік спецслужбы Іван Церцель.

Напрыканцы лістапада 2024-га праваабарончы цэнтр “Вясна” паведаміў, што з пачаткам поўнамаштабнай вайны Расіі супраць Украіны ў Беларусі пачасціўся пераслед замежнікаў за “агентурную дзейнасць” (арт. 358¹ КК). Паводле звестак праваабаронцаў, “агентурная дзейнасць” інкрымінаваная грамадзянам Украіны, Літвы, Латвіі, Польшчы, Японіі, Германіі.

Усяго паводле гэтага артыкула асуджана не менш як 19 чалавек, у сукупнасці з іншымі абвінавачаннямі ім прызначана ў агульнай складанасці 135 гадоў зняволення.

Шэраг заходніх дзяржаў, сярод якіх і суседнія краіны Еўрасаюза, заклікаюць сваіх грамадзян не наведваць Беларусь.